Публикации » Сассипе савăнтарать

27 июля 2011 г.

Хăйне астума пуçланăранпах юрлать Лена. Ашшĕ, Павел Семенович, купăс тăсса ярсанах хĕр пĕрчи юрă шăрантарнă. Шкулта вĕреннĕ вăхăтра ялти клуб сцени çинчен анман вăл. Мĕн каламалли, пĕринче туйри халăха та хăйĕн çепĕç сассипе савăнтарнă Елена Павлова. Вăтам шкул пĕтерсен фабрикăна ĕçе кĕнĕ. Унта пултарулăх кружокне çỹренĕ. Турă панă пултарулăхне курса хĕре культура училищине вĕренме кайма сĕннĕ. Унтан вĕренсе тухсан янăравлă саслă хĕре Кỹкеçри культура çуртне ĕçлеме янă. 1989 çултанпа унта тăрăшать Кармал хĕрĕ. Спектакльсенче те ăста вылять вăл. Пушă вăхăтра сăвăсем çырать. Елена Ялушкина "Дубравушка" ансамблĕн солисчĕ. Шăпчăк сассиллĕ ентешĕмĕр ытларах чăваш, вырăс халăх юррисене шăрантарать, кашни юррине чĕрĕлле юрлать. Сăн ỹкерчĕкре: Е.Ялушкина.