Публикации » Вырма каçалăкĕ уçăлнă

23 июля 2011 г.

Районти ял хуçалăх предприятийĕсенче вырма ĕçĕсем пуçланчĕç. Ĕнерхи кун тĕлне 4 хуçалăхра ("Яманчурино", "Победа" ОООсенче, "Рассвет", "Комбайн" ЯХПКсенче) пурĕ 45 гектар çинче пăрçа çулнă. Сăмах май, районĕпе асăннă культурăна 84 гектар çинче акса çитĕнтернĕ. "Комбайн" ял хуçалăх производство кооперативĕнчи иккĕмĕш бригадăра пăрçа çулма тухнă. Вырма каçалăкне Вячеслав Капламов экипажĕ уçнă. Палăртнă бригадăра "Дударь" сортлă пăрçана 20 гектар çинче çитĕнтернĕ. Малтан шутланă тăрăх унăн тухăçĕ те пысăк пулмалла. Чи кирли - ăна вăхăтра тата тăкаксăр пухса кĕртесси. Выльăх апачĕ хатĕрлес ĕç те чарăнса ларман. Нумай çул ỹсекен курăксенчен утă хывассине вĕçленĕ хыççăнах пĕр çул ỹсекен курăксенчен сенаж хатĕрлеме тытăннă. Ĕнерхи кун тĕлне траншейăсене пурĕ 4362 тонна сенаж хывнă.