18 июня 2011 г.
Ĕнер, çĕртмен 18-мĕшĕнче, Шупашкарта Аслă Аттелĕх вăр-çи пуçланнăранпа 70 çул çитнине палăртса "Асăну авточупăвĕ" старт илнĕ. Асăннă мероприятие çапăçусем хĕрỹ пынă вырăнсене çитсе курас, вăрçăра вилнисене хисеп тăвас тĕллевпе йĕркелесе ирттереççĕ. Авточупу Чулхула, Владимир, Тверь, Демянск хулисем урлă иртет. Колоннăра ГАЗ-67, DODGE WC-61, ГАЗ-М20 "Победа", ГАЗ-21 автомашинăсем пулаççĕ. Мероприяти пĕр эрнене тăсăлмалла. Унта хутшăнакансем Шупашкара çĕртмен 26-мĕшĕнче çитмелле. Çак тапхăрта вĕсем 139-мĕш стрелковăй дивизи хутшăннă çапăçу вырăнĕсене çитсе кураççĕ, вилнисене асăнса лартнă палăксем умне чечексем хураççĕ. Авточупу тапхăрĕнче Демянск хулинче вилнисене асăнса мемориал комплексне уçма палăртнă. 1941 çулхи çапăçусенче "Демянск хуранĕнче" 500 ытла чăваш салтакĕ пуçĕсене хунă.