07 июня 2011 г.
Çирĕклĕ Шăхалĕнчи ваттисем вăхăтлăх пурăнакан çуртра "Çакăн пек професси те пур..." мероприяти иртрĕ. Антонина Васильевна Осипова заведующи кунта пурăнакан ватăсен пурнăçĕ лайăх пултăр тесе тăрăшать. Ирхине ĕçе килсенех пурин сывлăхĕ çинчен ыйтса пĕлет, ĕçрен кайнă чухне "Чипер, сывлăхлă çĕр каçăр", - тесе хăварать. Кам та пулин чирлес пулсан та вăхăтне, килти ĕçне пăхмасăрах пирĕн пата килет. Эпир мĕн ыйтнине май килнĕ таран, хăвăрт пурнăçлама тăрăшать. Ватлăх кунĕсем тунсăх ан кỹччĕр тесе тĕрлĕрен хаваслă мероприятисем ирттерет. Çавăн пекех ватăсене хăйĕн автомашинипе милĕк касма, çĕр улми пуçтарма та илсе çỹрет. Чирлесен эмелсем илсе килсе парать. Социаллă работниксем - Антонина Ефимова, Альбина Васильева, Ирина Кувшина, Светлана Александрова пире лайăх пăхаççĕ. Тутлă апат пĕçерсе çитереççĕ, вăхăтра кĕпе-тумтир çуса параççĕ, мунча хутса кĕртеççĕ. Хальхи вăхăтра Борис Дудкин тăрăшнипе кунта пурăнакан арçынсемпе пĕрле теплица турĕç. Унта помидор, хăяр ỹстеретпĕр. Эпир, кунта пурăнакан ватăсем, хамăрăн социаллă работниксене уяв ячĕпе саламласа тав сăмахĕ калатпăр.