21 мая 2011 г.
Хальхи саманара çыншăн тĕрлĕ информаци тупасси чăрмав мар. Çапах та кашни информациех усăллă тесе калаймăн. Сиенлĕ пичет изданийĕсем, аудио-видео продукцисем ачасен аллине лекме пултарас хăрушлăх пысăк паян. Кун пирки Чăваш Республикин Президенчĕ çапла асăрхаттарнăччĕ: "Позитивлă шухăшлама хăнăхас темен çынсем, уйрăмах çамрăксем, чылай чухне информаци ĕçĕнчи ултавçăсенчен хур кураççĕ". Киревсĕр информацисем вара çамрăксен хушшинче террористсен тата экстремистсен ушкăнĕсем йĕркелес хăрушлăх кăларса тăратаççĕ. Вĕсене пулах наркотиксемпе, эрех-сăрапа туслашас текенсен, преступлени çулĕ çине тăракансен йышĕ ỹсме пултарĕ. Йĕрке хуралĕн ĕçченĕсем ачасене сывлăхпа ăс-тăн тĕлĕшĕнчен сиен кỹрекен информацирен хỹтĕлесси çине пысăк тимлĕх уйăраççĕ. Çак тĕллевпе тĕрлĕ рейд, тĕрĕслев йĕркелетпĕр. Ку тĕлĕшпе ашшĕ-амăшĕсене, вĕрентекенсемпе культура ĕçченĕсене те тимлĕ пулма ыйтатпăр.