04 мая 2011 г.
Чăваш Республикинче пенсин обязательнăй страховани тытăмĕнче шута илесси малалла пырать. Чăвашстат прогнозĕ тăрăх, çу пуçламăшĕнче республикăра 18 çула çитмен 248,5 пин ача шутланать. Кашнинех пенсин обязательнăй страховани тытăмĕнче шута илмелле. Çакă социаллă тата медицина пулăшăвĕсене илме çăмăллăх парĕ. Маларах вĕсене сусăр е ашшĕ-амăшне çухатнă ачасем пенси илнĕ, амăшĕн (çемье) капиталне илме сертификат тăратнă çемьесенчи, каникулсенче ĕçленĕ 14 çула çитнĕ ачасене çеç панă. Халĕ пĕтĕм ачасене пенсин обязательнăй страховани тытăмĕнче регистрацилессипе пенси служби вĕренỹ, медицина, социаллă пулăшу, ЗАГС тытăмĕсемпе тачă çыхăнса ĕçлет. Шкулсемпе ача сачĕсене çỹрекенсене свидетельство парассине йĕркеленĕ. Тин çеç çуралнă ачасене свидетельствăпа пĕрле памяткăсем парасси йăлара. Шкул çулне çитмен ачасене, енчен те вĕсем ясли-садсене çỹремеççĕ пулсан, поликлиникăсемпе халăха социаллă пулăшу паракан пайсем те памяткăсем параççĕ.