09 апреля 2011 г.
Кăçалхи ака уйăхĕн 26-мĕшĕнче Чернобыльти атомлă электростанцинче инкек пулнăранпа 25 çул çитет. Çак хăрушă инкек сахал мар çын пурнăçне илсе кайнă, чылайăшне ĕмĕрлĕхех сусăрлатса хăварнă. Елчĕк районĕнчи халăха социаллă хỹтлĕх паракан пай пĕлтернĕ тăрăх, паянхи кун районта 10 чернобылец пурăнать. Катастрофа пулнăранпа 25 çул çитнĕ май, ака уйăхĕнче районти тĕп библиотекăра тĕрлĕ мероприяти йĕркелеççĕ. Кунта паянхи кун "Чернобыль инкекĕ _ пĕтĕм этемлĕхшĕн чĕре ыратăвĕ", "Чернобыль _ виçĕ ăрăвăн тĕкĕрĕ çинче", "Истори вăрттăнлăхĕ" ятпа куравсем ĕçлеççĕ. Çак кунсенче вулавăшра Чернобыльте инкек тỹснисене халалласа право сехечĕ, çавра сĕтел, литературăпа поэзи каçĕ, информаци тата экологи сехечĕсем тата ытти мероприяти ирттерме палăртнă.