26 марта 2011 г.
Елчĕкри культурăпа кану центрĕнче Раççей культура ĕçченĕн кунне анлă паллă тунă. Районти культработниксене район администрацийĕн пуçлăхĕ Н.Миллин, райадминистрацин культура тата архив ĕçĕн секторĕн заведующийĕ А.Александрова, райадминистрацин социаллă хỹтлĕх пайĕн начальникĕ И.Аникина, Шупашкарти кооператив институчĕн ректорĕ, "Единая Россия" партин Чăваш регионĕнчи уйрăмĕн секретарĕн çумĕ В.Андреев тата ыттисем саламланă. Ĕçре хастаррисене, "Хавхалану çăл куçĕсем" фестиваль çĕнтерỹçисене дипломсемпе, грамотăсемпе тата парнесемпе чысланă. Уява ял тăрăхĕсенчи пултарулăх ушкăнĕсем илем кỹнĕ. Ыран пĕтĕм тĕнчери театр кунĕ пулнă май, культура ĕçченĕсем сценкăсем те хатĕрленĕ. Паянхи пурнăç саманчĕсенчи сăнарсене пăхса ларма пит кăмăллă. Ытти чухне халăха савăнтаракан культработниксем хăйсен уявне те асра юлмалла паллă тунă.