Публикации » Çамрăк çемьесене пулăшса

12 февраля 2011 г.

Паянхи кун пурăнмалли кĕтес ыйтăвĕ чылай çыншăн çивĕччисенчен пĕри шутланать, çамрăк çынсемшĕн уйрăмах. "Кăçал республика тата федераци шайĕнчи çамрăк çемье программăсем ĕçлеççĕ-ши?" - кăсăкланаççĕ пирĕн вулакансем. Патшалăх пулăшăвĕпе усă курса хваттер, çурт-йĕр туянма е çĕнĕрен хута яма чылай çăмăлрах-çке. Елчĕк район администрацийĕн капиталлă строительствăпа коммуналлă хуçалăх пайĕн специалисчĕсем пĕлтернĕ тăрăх, хальхи вăхăтра Чăваш Республикин "Çамрăк çемьесене пурăнмалли çурт-йĕр ыйтăвĕсене татса пама 2002-2015 çулсенче патшалăх енчен пулăшасси" тата Раççей Федераци шайĕнчи "Пурăнмалли çурт-йĕр" программăн "Çамрăк çемьесене çурт-йĕрпе тивĕçтересси" çумпрограммăсемпе çурт-йĕр условийĕсене лайăхлатас текенсенчен заявленисем йышăнаççĕ. Федераци шайĕнчи программăна кăçал 2015 çулччен тăснă, ăна пурнăçа кĕртмешкĕн кăçалхи çул валли республика бюджетĕнчен 100 миллион тенкĕ пăхса хăварнă.