22 декабря 2010 г.
Пирĕн служба вĕсене пулăшас тĕллевпе тĕрлĕ предприяти-организаци ертỹçисемпе, предпринимательсемпе çыхăнать, вĕсенче пушă ĕç вырăнĕсем - ваканси пурри çинчен ыйтса пĕлет. Каярахпа вакансисен ярмăрккине ирттеретпĕр. Унта хутшăнма хамăр патăмăрта шутра тăракансене чĕнетпĕр. Центрта тăрăшакансен ĕçĕ нумай енлĕ, пĕлтерĕшлĕ. Мĕншĕн тесен киленĕçлĕ ĕç пурнăç тыткăчи пулнине кунти кашни ĕçчен лайăх ăнланать. Кăçалхи 11 уйăхра ĕçе вырнаçас тĕллевпе центра 1332 çын, иртнĕ çулхинчен 23 процент сахалрах çын пынă. Ĕç шыракансен йышĕнче хăйсен ирĕкĕпе коллективран кайнисем (29 процент), организаци-предприяти е учреждени хупăннипе е ĕçлекенсен штачĕн йышне пĕчĕклетнипе тата ку е вăл предприятире тăрăшакансен шутне чакарнипе шалусăр тăрса юлнисем (3,2 процент), тĕрлĕ шайри професси пĕлĕвĕ паракан вĕренỹ заведенийĕсенчен тата вăтам шкулсенчен вĕренсе тухнисем (7,5 процент), социаллă хỹтлĕхе тивĕçлĕ категорири çынсем (пенсие тухма хатĕрленекенсем, нумай ачаллă тата пĕччен ашшĕ-амăшĕ, инвалидсем, ирĕклĕх прависĕр хăварнисене хупса усракан çĕртен таврăннисем, çар тивĕçне пурнăçланисем (9,7 процент), вĕренỹрен ирĕк вăхăтра ĕçлеме кăмăл тунă 14 çултан пуçласа 18 çулчченхи çул çитмен çамрăксем (37,8 процент). 2010 çулхи чỹк уйăхĕн 1-мĕшĕ тĕлне ĕçлев центрĕнче ĕçсĕр тăрса юлнă 99 çынна шута илнĕ. Районти ĕçсĕрлĕх шайĕн кăтартăвĕ, вăй питти çынсемпе танлаштарсан, 0,8 процент шутланать. Ĕçсĕр юлнă çынсенчен 74-шĕ - хĕрарăмсем, вăтăр çула çитмен çамрăксем - 16 процент, пенси ỹсĕмĕнчи (тивĕçлĕ канăва тухасси 1-2 çул юлнă) çынсем - 9 процент. Предприятие хупнипе тата персонал йышне пĕчĕклетнипе ĕçсĕр тăрса юлнисем (19,2 процент) ĕçлев центрне юлашки шанăç вырăнне хурса кунта килсе регистрациленнĕ. Шута тăнă çынсен 74 проценчĕ хăйсен ирĕкĕпе ĕçрен кайнисем. Юлашки çулсенче общество ĕçне хутшăнтарасси çине те пысăк тимлĕх уйăратпăр. Вĕсене вăхăтлăх е сезонлăх йĕркелетпĕр. Чылайранпа ĕçлемен тата опыт пухман çынсемшĕн çакă питĕ меллĕ. Общество ĕçĕ нумай енлĕ. Чылай чухне çынсене çулла - урамсене, парксене, масарсене çỹп-çапран тасатма, хĕлле - çав вырăнсенчех юр хырса тирпейлеме, çурт тăррисенчен пăрсене антарма явăçтараççĕ. Пирĕн ĕçченсемшĕн çулталăкăн кирек хăш вăхăтĕнче те канăç çук, вĕсем хĕлле çулсене, объектсене юртан тасатаççĕ, çăва тухнă май территорисене тирпей-илем кĕртес енĕпе вăй хураççĕ, клумбăсене тасатса чечексем акаççĕ-лартаççĕ, ял хуçалăх культурисем туса илме, вĕсене çум курăкран тасатма, выльăх апачĕ хатĕрлеме, тырă-пулă пухса кĕртме хутшăнаççĕ. Ялта пурăнмалли çурт-йĕрпе коммуналлă хуçалăха тытса тăма укçа-тенкĕ сахал уйăраççĕ. Çавна май пур пек служба тирпей-илем кĕртме ĕлкĕреймест. Ку чухне ĕçсĕррисен пулăшăвĕ питех те вырăнлă. Елчĕк ялĕ чылайранпа республикăри чи тирпейлĕ район центрĕсен шутĕнче. Ытти ялсем те самаях хитреленчĕç, симĕсленчĕç. Çак ĕçре центрта шутра тăракансен тỹпи те пысăк пулнине палăртатпăр. Общество ĕçĕсем тирпей-илем кĕртессипе анчах çыхăнман. Ĕçсĕррисен тепĕр пысăк ушкăнĕ ял хуçалăх предприятийĕсемпе хресчен (фермер) хуçалăхĕсене ака-суха, вырма тата кĕрхи уй-хир ĕçĕсенче пулăшать. Район администрацийĕпе ял тăрăхĕсем, "Кирпич" ООО, "Комбайн", "Прогресс", Ленин ячĕллĕ ял хуçалăх предприятийĕсем, "Яманчуринская сельхозхимия" ООО тата ыттисем те пире ăнланакан тата ĕçсĕррисене обществăлла ĕçре тăрăшма май туса паракан кулленхи партнерсем шутланаççĕ. Чылай тĕслĕхре общество ĕçĕсене вăхăтлăха хутшăнакансем яланлăх ĕç вырăнĕ тупаççĕ. Халăха ĕçпе тивĕçтерекен центр кăçал ĕçсĕр тесе шута илнĕ 262 çынна вăхăтлăх обществăлла ĕçе явăçтармалла пулнă пулсан, эпир предприятисемпе тата организацисемпе тачă çыхăну тытса 310 çынна тỹлевлĕ вăхăтлăх ĕçе вырнаçтарма пултартăмăр. Çак тĕллевпе федераци бюджетĕнчен 578400 тенкĕ тăкакланă. Йывăр вăхăтра пулăшнăшăн, алла усма паманшăн центрта тăрăшакансен ячĕпе тав сăмахĕ каланине час-часах илтме тỹр килет. Мĕншĕн тесен центрăн пысăках мар туслă коллективĕ кунта пысăк шанăçпа килнĕ кашни çыннăн нуши-тертне чĕре витĕр кăларса пулăшма тăрăшать.