Публикации » Ватă çын пурнăçне çăлнă

15 декабря 2010 г.

Кĕçĕн Таяпари пĕтĕмĕшле пĕлỹ паракан тĕп шкулти 9-мĕш класра вĕренекен Сергей Титов шкултан таврăннă чухне кỹршĕре пурăнакан Петр Архипов хапхи умне юр хỹсе тултарнине асăрханă, кил хуçине темиçе кун курманнине аса илнĕ. Ырра мара сиссе шкул ачи сукмака юртан тасатса ватă çын пурăнакан пỹрте кĕнĕ. Шалта вăл пĕр хускалмасăр выртакан ватă çынна асăрханă. Çийĕнчех васкавлă пулăшу машини чĕнсе больницăна ăсатнă. Каярахпа çак паллă пулнă: Петр Архипов пăрлă çанталăкра картишĕнче шуса ỹксе питĕ вăйлă суранланнă иккен. Анчах пỹрте шуса кĕме пултарнă, унта пĕр хускалми икĕ кун выртнă. Çитменнине çурта хутса ăшăтакан газ хуранĕ те сỹнсе ларнă. Ватă çын тата унăн ачисем шкул ачине тав тăваççĕ.

Сăн ỹкерчĕкре: Сергей Титов.