04 декабря 2010 г.
Федерацин 2011 çулхи тата 2012-2013 çулсен тапхăрĕнчи бюджечĕн социаллă пайĕ çинчен Раççей Федерацийĕн Патшалăх Думин депутачĕ, "Единая Россия" фракцин ертỹçин çумĕ Валерий Рязанский чарăнса тăнă: "Бюджет çинчен калакан саккуна йышăннă. Çывăх вăхăтра ăна Федераци Канашĕ çирĕплетесси, Президент алă пусасси пирки сăмах çук. Бюджетăн тĕп çул-йĕрĕ - унăн социаллă пурнăç енĕ. Бюджет дефицичĕ пур пулин те, халăх ыйтăвĕсене тивĕçтерекен пая туллин пурнăçлатпăрах. Пенси тата социаллă тỹлевсене индексацилетпĕр. Пĕлтерĕшлĕ наци проекчĕсене пĕтĕмпех пурнăçлама укçа-тенкĕ уйăрасси малалла пырать. Çакă социаллă проектсен малашлăхне хурлакан оппозицине пирĕн енчен хурав пулĕ. Ветерансем валли çурт-йĕр малалла хăпартма укçа-тенкĕ уйăрасси те бюджетра паллă вырăн йышăннă. Хальлĕхе Аттелĕхĕн Аслă вăрçин 156 пин участникĕ черетре тăрать. Вĕсенчен 62 пинĕ çурт-йĕр илнĕ, ыттисене хваттерсемпе тивĕçтересси малалла пырать. Аттелĕхĕн Аслă вăрçин участникĕсем çурт-йĕр условийĕсене лайăхлатас енĕпе палăртнă обязательствăсене пурнăçлатпăрах. "Единая Россия" вăрçа хутшăннисене документсем хатĕрлеме пулăшма тĕллев лартнă. Тăлăх ачасене те укçа-тенкĕпе тивĕçтерес енĕпе палăртнă программăна пурнăçлама 6 хут ытларах финанс уйăратпăр. Унсăр пуçне бюджетра наукăпа вĕрентĕве аталантарма каякан тăкаксене 50 процент ỹстеретпĕр. Çулсене юсама уйăракан укçа-тенкĕне те палăртнă. Унăн пĕр пайне - 11,3 миллиард тенкĕ - пурте усă куракан автоçулсене тĕпрен юсама тата ытти юсав ĕçĕсене пурнăçлама яратпăр. Иккĕмĕш пайĕ - 22,7 миллиард тенкĕ - субъектсен администраци центрĕнче вырнаçнă нумай хваттерлĕ çуртсем патне пыракан çулсене тĕпрен юсама каять. Федераци бюджечĕн тепĕр уйрăмлăхĕ вăл - шкул çулне çитмен ачасен учрежденийĕсем тумалли программăна пурнăçлама 500 миллион тенкĕ уйăрни. Çар служащийĕсем валли çурт-йĕр çĕклеме 105 миллиард тенкĕ уйăрнă. Çак ыйтăва 2012 çул тĕлне татса паратпăр. Бюджета тимлĕн, шутласа хатĕрленĕ. Халăхăн социаллă ыйтăвĕсене татса парассипе обязательствăсене пурнăçа кĕртетпĕрех".