29 сентября 2010 г.
Пирĕн районта 130 суту-илỹ точки. Кашни лавккан сентрисем йăтăнса анасла лараççĕ. Мĕн кăна çук-ши унта? Енчĕкỹ тулли пулсан паян хăвна кирлĕ кирек мĕнле апат-çимĕçе те туянма пулать ял лавккисенче. Анчах сахал ĕçлесе илекенсем, ватăсем тутлине туянасси çинчен шухăшламаççĕ, вĕсене куллен кирлĕ таварсен хакĕсем ан "çыртчăр". Районти суту-илỹ рынокĕнчи хаксене пăхса тăрас тĕлĕшпе ЧР экономика аталанăвĕн, промышленноç тата суту-илỹ министерствин ĕçне шута илсе район пуçлăхĕ кăçалхи авăн уйăхĕн 1-мĕшĕнче 160-мĕш номерлĕ хушу кăларнă. Унта суту-илỹ рынокĕнче халăха куллен усă куракан апат-çимĕç таварĕсен эрнери мониторингне ирттермеллине палăртнă. Районти мĕн пур лавккари хаксене тỹрех пăхса тухайманран, 7 лавккан хакĕсене кашни эрнерех тишкеретпĕр. Елчĕкри "София", "Мускат", "Акатуй", "Родник", "Арбат", Шăмалакри "Катюша", Яманчỹрелĕнчи А.Ефимов лавккисенчи апат-çимĕç хакĕсемпе тĕплĕн паллашрăмăр. Иртнĕ эрнере вĕсенче 600 грамм таякан хура çăкăр 14 тенкĕпе, 700 грамли _ 14 тенкĕ те 37 пуспа, 400 грамлă батон 13 тенкĕ те 42 пуспа, тулă çăнăхĕн 1 килограмĕ 17 тенкĕ те 50 пуспа, çу хисепĕ 3,2 процентлă пастеризациленĕ 1 литр сĕт 29 тенкĕпе, çу хисепĕ 20 процентлă çур литрлă хăйма 39 тенкĕ те 25 пуспа, 1 кг услам çу (хамăр çĕр-шывра кăларни) 158 тенкĕ те 75 пуспа, çу хисепĕ 2,5 процентлă çур литр кефир 15 тенкĕ те 20 пуспа танлашнă. Çак апат-çимĕçсен хакĕсем эрне хушшинче ỹсмен. Тип çу хакĕ вара палăрмалла хăпарнă. 1 литрлă тип çу 40 тенкĕрен 55 тенкĕ те 60 пуса çитнĕ. Районти лавккасенче ытларах Шупашкарти çăкăра сутаççĕ. Юлашки вăхăтра Яманчỹрелти, Шăмалакри суту-илỹ точкисенче Елчĕкре пĕçерекен çăкăр-булка изделийĕсем курăнни савăнтарать. Хаксен мониторингне эрнере пĕрре пĕтĕмлететпĕр. Унпа район администрацийĕн "ценовая информация" баннерта паллашма пулать. Çакна та палăртмалла: районта куллен усă куракан апат-çимĕç хакĕсене тивĕçсĕр ỹстерсе янă тĕслĕхсене тĕрĕслесе тăма ĕçлĕ ушкăн йĕркеленĕ. Çавна май суту-илỹ точкисенче тăтăшах пулатпăр, таварсен хакĕсемпе интересленсех тăратпăр. Хăйсен тăрăхĕсенчи лавккасенчи хаксене ял тăрăхĕсен пуçлăхĕсем те тĕплĕн тишкереççĕ.