25 сентября 2010 г.
Район центрĕнчи нумай хваттерлĕ çуртсене çут çанталăк газĕпе хутса ăшăтмалла тăвассине - монтаж ĕçĕсене пурнăçлассине малтан палăртнă пек - авăн уйăхĕн 1-мĕшĕ тĕлне вĕçленĕ. Çуртсенче монтаж ĕçĕсене пурнăçланă Елчĕкри газ участокĕн тата муниципалитетăн юсавпа техника предприятийĕн специалисчĕсем хальхи вăхăтра пускпа наладка ĕçĕсене тăваççĕ. Комсомольски урамĕнчи 8-мĕш çурта газ янă ĕнтĕ. Кунти ĕçсене Елчĕкри газ участокĕ пурнăçланă. 8-мĕш çуртри хваттер хуçисем хăйсем те пуçаруллă пулнă - ĕçе чи малтан пуçăннă. Малти - малах. Çак урамри ытти çуртсенче, Октябрь урамĕнчи 22, 24-мĕш çуртсенче юлашки ĕçсене вĕçлесси тăрса юлнă. Хваттерсенче пурăнакансен ĕç документацине йĕркелесе çитермелле - тĕтĕм тухакан пăрăха тĕрĕсленин актне (ВДПОран илмелле), счетчик, котел туяннин хучĕсене Елчĕкри газ участокне çитермелле. Юпа уйăхĕн 1-мĕшĕччен нумай хваттерлĕ çуртсенчи 140 хваттере газ ямалла. Унччен вара вăхăт нумай та тăрса юлмасть. Ĕçе хăвăртлатмалли куç кĕрет. Пуçăннă ĕçе вăхăтра вĕçлесси çынсенчен хăйсенчен те нумай килет. - Иртнĕ çул Юбилей урамĕнчи 14-мĕш, Комсомольски урамĕнчи 3-мĕш çуртсенче пурăнакансем шăпах газ кĕртес ĕçе каярах хăварса пынине пула юлашкинчен тĕрлĕ йывăрлăхсемпе тĕл пулчĕç, çанталăк сивĕтсен анчах монтаж ĕçĕсене пурнăçларĕç. Иртнĕ çулхи йăнăшсене тăвас марччĕ, - тет район администрацийĕн строительство, пурăнмалли çуртсемпе коммуналлă хуçалăх пайĕн ертỹçи И.Кузнецов.