Публикации » Хаçат тусĕ - ылтăн медаль хуçи

03 июля 2010 г.

Вулакансене хаçатăн çывăх тусĕпе _ пултаруллă çамрăкпа паллаштаратпăр. Наталья Ефимова кăçал Çирĕклĕ Шăхальти пĕтĕ-мĕшле пĕлỹ паракан вăтам шкултан ылтăн медальпе вĕренсе тухрĕ. Сăпайлă та лăпкă хĕр ачан çитĕнĕвĕсем курăмлă. Район тата республика шайĕсенчи предмет олимпиадисенче пĕрре мар палăрнă вăл. Тĕрлĕ шайра иртекен пултарулăх конкурсĕсене те хаваспах хутшăннă. Иртнĕ çул В.Эктел ячĕллĕ премие илме тивĕç пулнăччĕ хĕр ача, кăçал вара К.Иванов çуралнăранпа 120 çул çитнине халалласа республика шайĕнче "Çакă çутă тĕнчере вăйли çук та этемрен" ятпа иртнĕ пултарулăх конкурсне хутшăнчĕ. "Публицистика" номинацире пĕрремĕш вырăна тивĕçсе дипломпа парне илчĕ вăл. Сăмах май, иртнĕ çул "Нарспи" поэмăна çырнăранпа 100 çул çитнине халалласа ирттернĕ республика шайĕнчи сочиненисен конкурсĕнче те мала тухнăччĕ хĕр. Илемлĕ хайлавсем çырма шăпах К.Иванов çырнă сăвăлла юмахсем пулăшнине те пытармасть вăл. Паян Наталья вулакана юрату çинчен çырнă калавĕпе паллашма сĕнет.