23 июня 2010 г.
"Физкультурăпа тата спортпа хавхаланни, пахалăхлă апатлану, çỹллĕ шайри культура тата пĕлỹлĕх, эрех-сăра ĕçессине, табак туртассине, наркотиксемпе айкашассине сивлени _ чăннипех ăнăçуллă пулас тетпĕр пулсан, акă мĕнпе палăрса тăмалла пирĕн, Чăваш Енре пурăнакансен", _ çапла палăртнă Н.Федоров Патшалăх Канашне янă Çырăвĕнче. Табак туртассине сивлесе Николай Васильевич "Чăваш Республикинче табак туртассине хирĕç пурнăçламалли хушма профилактика мерисем çинчен" указ та кăларчĕ. Çак çивĕч ыйтусене республика шайĕнче çĕклени ахальтен мар. Мĕншĕн тесен табак туртнине пула çĕр-шывра çуллен 400 пине яхăн çын вилет. Ыйтăва татса памасăр сывă та аталаннă общество пулаймĕ. Çырура тата указра палăртнă темăсем тавра эпир тĕрлĕ калаçусем пуçаратпăр, халăха киревсĕр йăласенчен хăтăлма е пăрăнма хистесе сахал мар ĕçлетпĕр. Çапах обществăн ку енĕпе татах та тăрăшса ĕçлемелле, асăннă ыйтусем çине кашни кунах, кашни минутрах тимлĕх уйăрмалла. Манăн район халăхне, уйрăмах çамрăксене, табак туртассинчен е ытти киревсĕр йăласенчен паянах пăрăнма, хамăрăн сывлăхшăн тăрăшма ыйтас килет.