16 июня 2010 г.
Çĕр-шыва хỹтĕлесси _ кашни çамрăкăн таса тивĕçĕ. Елчĕк каччисем район ятне çĕре ỹкерменни, çĕр-шыв хỹтĕлевçи ята çỹллĕ шайра тытса çар тивĕçне тỹрĕ кăмăлпа пурнăçлани савăнтарать. Элекçей Тимеш ялĕнчи Алевтина Васильевнăпа Николай Александрович Кузьминсем вара çак кунсенче ывăлĕ службăра тăракан çар чаçĕн командованийĕнчен Тав çырăвĕ илчĕç. Салтака кайнă чух тăванĕсемпе пĕлĕшĕсем, çар комиссариачĕн ĕçченĕсем Александра салтак чысне упрама, присягăна çирĕп пăхăнса çĕр-шыва хăюллăн хỹтĕлеме сĕнни çĕре ỹкменшĕн савăнчĕç вĕсем. "Сирĕн ывăлăр Александр службăн малтанхи кунĕсенченех çĕр-шыв умĕнчи тивĕçе чыслăн пурнăçлать, хастарлăхпа палăрнăшăн ăна çар чаçĕн командованийĕ пĕрре анчах мар хавхалантарнă. Тивĕçлĕ воспитани панăшăн, патриот çитĕнтернĕшĕн пысăк тав сире", _ çырнă çырура. Çакăн евĕр ăшă сăмахсене вуласан кирек камăн та чунĕ савăнать. Ырă сăмах ачасем пирки пырать пулсан пушшех те. Çар ретне тăрас умĕн Александр Мускаври гуманитари институчĕн Шупашкарти филиалĕнче 2 çул пĕлỹ илнĕ. Çартан таврăнсан йĕкĕт вĕренĕве малалла тăсĕ.