15 мая 2010 г.
Аслă Елчĕкре пурăнакансем урамсене тирпей-илем кĕртесси çине ытларах тимлĕх уйăрма тытăннине кашни çулхи тĕслĕхре курса ĕненетпĕр. Ял тăрăхĕн администрацийĕ "Ялти чи лайăх урам" конкурс йĕркеленипе те çыхăннă çакă. Иртнĕ çул çак конкурсра Свердлов урамĕ мала тухнăччĕ. Кунта пурăнакансем, хăйсен урамне чăннипех тирпейлĕ, таса тытаççĕ. Ку енĕпе вĕсем ыттисене те тĕслĕх кăтартаççĕ. Пусăсене те, çул-йĕре те лайăх пăхса тăраççĕ, урама кашни çул йывăç хунавĕсем лартса хăвараççĕ. Çынсем пĕр-пĕринпе килĕштерсе пурăнаççĕ, кирлĕ чухне пулăшма та ỹркенсе тăмаççĕ. Ваттисем те çамрăксенчен тăрса юласшăн мар. 86 çулхи Анна Чернова, акă, урама тирпей-илем кĕртес ĕçе кашни çул хастар хутшăнать.