Публикации » Хăюллă çамрăксем преступникран хăраман

05 мая 2010 г.

Аслă Пăла Тимеш ялĕнче пулса иртнĕ тискер ĕç çĕр-шывĕпех калаçтарчĕ. Ака уйăхĕн 24-мĕшĕнче Канаш районĕнчи Сухайкасси ялĕнчи психика тĕлĕшĕнчен чирлĕ çын Çветтуй архиерей Микулай чиркĕвĕн пачăшкине Анатолий Сорокин протоиерее чиркỹ картишĕнче вăрттăн ăсталанă пăшалтан персе вĕлернĕ. Çак тискерлĕхе курнă, чиркỹ çывăхĕнче пулнă икĕ çамрăк _ Сергей Плотниковпа Федор Перепелкин çухалса кайман, преступник пăшаллă пулнине пĕлсе тăрсах ăна хăвалама пуçланă. Çын вĕлерекен вĕсенчен тарса хăтăлайман. Иртнĕ шăмат кун ШĔМĕн Елчĕк районĕнчи шалти ĕçсен пайĕн начальникĕ В.Волков хăюллă çамрăксене шалти ĕçсен пайне йыхравларĕ, преступника вăхăтлă тытса чарма пултарнăшăн вĕсене Тав çырăвĕпе тата хаклă парнепе чысларĕ. Сăн ỹкерчĕкре: çамрăксене чысланă самант.