Публикации » Тỹлевсĕр телефон ĕçлет

10 апреля 2010 г.

 Раççей Пенси фончĕн колл-центрĕ ĕçлеме пуçланă. Вăл патшалăх пенсие хушса паракан программăна хутшăнас текенсен ыйтăвĕсене нумай каналлă телефонпа татса пама пулăшать. Талăкăн кирек хăш вăхăтĕнче те 8-800-505-55-55 телефонпа шăнкăравласа эсир пулас пенси виçипе çыхăннă ыйтусем çине хурав илме пултаратăр. Пирĕн районта патшалăх хушса паракан пенсин программине 425 çын хутшăннă. Тĕпрен илсен, усăллă меле 40-60 çулсенчи граждансем кăмăллаççĕ. Унта хутшăнакансенчен чи асли _ 95 çулта, чи кĕçĕнни 5 çулта. Хĕрарăмсем тата хулара пурăнакансем пуçаруллăрах. Программăна суйласа илнисен 60 проценчĕ взноса хăй тĕллĕн банк урлă тỹлет, ыттисемшĕн ĕç вырăнĕнчи бухгалтери урлă куçарса параççĕ. Аса илтеретпĕр, патшалăх пулăшăвне тивĕçме программăна хутшăнакан çыннăн хăйĕн пулас пенсийĕн фондне çулталăкра 2000-12000 тенкĕ хывмалла, патшалăх çав укçана икĕ хут пысăклатма май туса парать.