31 марта 2010 г.
Пуш уйăхĕн вĕçĕнче, хĕвел ăшшинче чĕвĕлтетсе юрă шăратакан кайăксем вĕçсе килнĕ, çут çанталăк чĕрĕлнĕ вăхăтра кун çути курнăран мар-ши Элпуç ялĕнче çуралса ỹснĕ Сергей Александрович Павлов шăпчăк сассиллĕ. Вăл шăрантаракан юрăсем такама та тыткăна илеççĕ. Пултаруллă ентешĕмĕр спектакльсенче те мĕн чухлĕ сăнар калăпланине шутласа та пĕтерес çук. Ытларах кулăшла рольсене вылянăран пулĕ артиста питĕ килĕштереççĕ. Юратнă юрăç çак кунсенче хăйĕн çуралнă кунне 45-мĕш хут уявлать. Çулсем иртнишĕн кулянма вăхăт çук унăн. Юлашки çулсенче Сергей Павлов юрă-кĕвĕ жанрĕнче улăпла утăмсем тăвать. Юрлать, сăвă та çырать, фортепьянопа, гитарăпа, баянпа, купăспа калать. Пĕр сăмахпа, хăй ĕçĕнче чăн ăста. Ахальтен мар ăна Чăваш Республикин тава тивĕçлĕ артисчĕ ят панă. Сăн ỹкерчĕкре: С.Павлов.