27 марта 2010 г.
Райадминистрацин вĕрентỹпе çамрăксен политикин пайĕ тата Çирĕклĕ Шăхальти пĕтĕмĕшле пĕлỹ паракан вăтам шкул поэзие юратакан, ăнланакан, чунпа туякан пултаруллă вĕренекенсемпе вĕрентекенсене тупса палăртас тĕллевпе "Поэзи çăлтăрĕсем _ 2010" фестиваль йĕркелеççĕ. Вăл икĕ тапхăрпа иртет. Шкулсен шайĕнчи тапхăра пуш уйăхĕнче, район шайĕнчине ака уйăхĕн 29-мĕшĕнче Çирĕклĕ Шăхальти вăтам шкулта ирттерме палăртнă. Фестивале хутшăнакансем 4 ушкăна пайланаççĕ: вĕрентекенсем тата 1-4-мĕш, 5-8-мĕш, 9-11-мĕш классенче вĕренекенсем. Конкурс участникĕсем 3 номинацирен пĕрне суйласа илме пултараççĕ: "Чăваш çыравçисен вăрçă темипе çырнă хайлавĕсене илемлĕ вуласси", "Вăрçă тематики _ автор сăввисенче", "Артист пултарулăхĕ (чăваш çыравçисен хайлавĕнчен _ пĕр эпизод)". Шкулта палăрнă çĕнтерỹçĕсен заявкăсене ака уйăхĕн 23-мĕшĕччен райадминистрацин вĕрентỹпе çамрăксен политикин пайĕн ертсе пыракан специалист-эксперчĕ Н.Малышкин е Çирĕклĕ Шăхаль шкулĕнче чăваш чĕлхипе литературине ертсе пыракан Н.Левая патне çитермелле. Çĕнтерỹçĕсене Хисеп хучĕсемпе тата парнесемпе чыслĕç.