13 марта 2010 г.
Кавалти культура çуртĕнче хĕрарăмсен кунне халалланă "Айтăр-ха, аннесем" конкурс иртрĕ. Вăл пуçланас умĕн пухăннисене уяв ячĕпе "Комбайн" ял хуçалăх производство кооперативĕн ертỹçи Г.Федоров саламларĕ. Виçĕ ушкăн тупăшрĕ конкурсра. Питтĕпел, Кивĕ Эйпеç, Кавал ялĕсенчи аннесем тăван хуçалăхра тĕрлĕ çĕрте тăрăшаççĕ. Вĕсем хушшинче "Професси енĕпе чи лайăххи" ятсене çĕнсе илнисем те пур. Чăнах та, паян амăшĕсем ĕçлеме кăна мар, канма та пĕлнине, вăййа-кулла питĕ ăста пулнине тепĕр хут çирĕплетрĕç. Хĕрỹ кĕрешỹре пĕрремĕш бригада хĕрарăмĕсем ыттисенчен ăстарах пулни палăрчĕ. Уява пуçтарăннă чипер те сăпайлă аннесене, пикесене хуçалăхри профком председателĕ П.Анисимов саламларĕ. Хуçалăх ертỹçи Г.Федоров вара конкурса хутшăннисене чĕрĕ чечексемпе хаклă парнесем парса хавхалантарчĕ.