03 февраля 2010 г.
Чăваш Республикин Президенчĕ Н.Федоров кашни çулах хăйĕн Указĕпе ĕçре, вĕренỹре, творчествăра, ытти отрасльсенче палăрнă 1000 çамрăка ятран паракан стипендисемпе чыслать. 2002 çулта унăн сумми 1000 тенкĕ пулнă, кăçал вăл 1830 тенкĕпе танлашать. 9 çул хушшинче çак чыса пирĕн районта пурăнакан вун-вун çамрăк тивĕç пулнă. Кăçал ăна улттăн тивĕçнĕ: "Марс" ЯХПКри ĕнесене машинăпа сăвакан В.Г.Валиева оператор, Елчĕк шкулĕнчи К.В.Васильева, Курнавăш шкулĕнчи К.П.Смирнова вĕренекенсем, "Яманчурино" ОООри А.В.Немцев тракторист, район администрацийĕн ертсе пыракан специалист-эксперчĕ И.И.Никонова, районти тĕп больницăра ĕçлекен çамрăксен канашĕн председателĕ С.М.Яковлев врач. Тунти кун район пуçлăхĕ Н.П.Миллин çамрăксене Чăваш Республикин Президенчĕн ятран паракан стипендине илнĕ ятпа саламларĕ, ĕçре, вĕренỹре, общество пурнăçĕнче малашне те малта пулма ырă сунчĕ, стипендиатсене свидетельствăсем пачĕ.