Публикации » Аслă Елчĕк шкулĕ çĕнтернĕ

27 января 2010 г.

Аслă Елчĕкре районти шкулсенчи вăтам ушкăнри вĕренекенсем хушшинче "Ылтăн шайба" клуб парнисене çĕнсе илессишĕн хоккей ăмăртăвĕ пулса иртнĕ. Кунта пурĕ виçĕ команда _ Елчĕкри тата Аслă Елчĕкри пĕтĕмĕшле пĕлỹ паракан вăтам тата Патреккелти пĕтĕмĕшле пĕлỹ паракан тĕп шкул командисем хутшăннă. Малтанхи вăйăра Аслă Елчĕксемпе Патреккелсем тупăшнă, Аслă Елчĕксем Патреккелсенчен 5:1 шутпа выляса илнĕ. Иккĕмĕш вăйăра Патреккелсем Елчĕксене 3:2 шутпа çĕнтернĕ. Унтан Аслă Елчĕк шкулĕн команди Елчĕкри вăтам шкулти çамрăк хоккеистсене 7:0 шутпа парăнтарнă. Турнирта Аслă Елчĕкри пĕтĕмĕшле пĕлỹ паракан вăтам шкул команди çĕнтерỹçĕ пулса тăнă. Çĕнтерỹçĕсемпе вăйăра палăрнă вĕренекенсене район пуçлăхĕн çумĕ _ район администрацийĕн вĕрентỹ тата çамрăксен политикин пайĕн ертỹçи Л.Левый спортри ỹсĕмсемшĕн тав тунă. Елчĕк районĕн пĕрлештернĕ хоккей команди республикăри ăмăртăва хутшăнать.