Публикации » Тăван тавралăха упрар, юратар

10 октября 2009 г.

Тăван тавралăха тирпей-илем кĕртес, йывăç-тĕм лартас тĕлĕшпе ирттерекен экологи уйăхлăхĕ иртесси çинчен Тăрăм ял тăрăхĕн территорийĕнче пурăнакансем малтанах пĕлнĕ. Мĕншĕн тесен çакăн çинчен пĕлтерсе кашни яла пĕлтерỹсем çакнă, ăнлантару ĕçĕсене туса ирттернĕ. Юпа уйăхĕн 6-мĕшĕнче Тип Тимешре килти хушма хуçалăхра пуçтарăннă тĕрлĕ таса мара, ăпăр-тапăра пуçтарса районти ятарлă свалкăна леçессине йĕркеленĕ. "Знамя" ял хуçалăх производство кооперативĕ çакăн валли ятарласа автомашина та уйăрнă. Анчах ялта пурăнакансенчен ытларахăшĕ çакна хаклама пĕлмен. 86 уйрăм хуçалăхран 9 хуçалăх анчах хăйсен килĕнче пуçтарăннă ăпăр-тапăра районти свалкăна леçме килĕшнĕ. Ыттисем ăна унчченхи пекех ялти тарăн çырмасене пăрахасшăн-и? Анчах малашне апла пулмĕ. Тăван тавралăха варалакансене, саккуна сĕмсĕррĕн пăсакансене пысăк штрафсем кĕтеççĕ. Çынсен шухăшĕсене мĕнле улăштармалла? Тăван тавралăха упрамалла, эпир çут çанталăкăн пĕр пайĕ пулса тăратпăр-çке.