07 октября 2009 г.
Ватă çынсен уявне, ытти ялсенчи пекех, Ĕнел клубне те халăх йышлăн пуçтарăнчĕ. Кăçал уява ял халăхне кăна мар, Тỹскел ялĕнчи ватăсене те йыхравларăмăр. Кỹршĕсемпе яланах килĕштерсе пурăнатпăр эпир. Пĕр хуçалăхра тăрăшатпăр. Залра юрă-кĕвĕ сасси. Икĕ ретĕн сĕтелсем лартса тухнă. Вĕсен кĕреки тулли. Ĕçре пиçĕхсе пенсие тухнă çамрăк мар çынсене Елчĕк ял тăрăхĕн пуçлăхĕ В.Сайкин саламларĕ, çамрăксемшĕн вĕсем ырă тĕслĕх пулнине палăртрĕ. Уява ялти артистсем çеç мар, Тỹскелĕн çамрăк та пултаруллă хĕрĕсем те хутшăнчĕç. Вĕсем пурте хăйсен юрри-ташшипе ватăсене тĕлĕнтерчĕç, савăнтарчĕç. Ватăсем пĕр вырăнта лармарĕç. Тĕрлĕ конкурсра тупăшрĕç, юрларĕç, ташларĕç. Тỹскелти Н.Галкин вара купăса тăсрĕ çеç. Уява хаваслă ирттерме пулăшнă спонсорсене пысăк тав.