16 сентября 2009 г.
Çуран чупма юратакансемшĕн чи пысăк ăмăртусенчен пĕри _ "Советская Чувашия" хаçат эстафети. Пирĕн районти командăсем çак кĕрешĕве çулсеренех хутшăнаççĕ. Мухтавлă ентешĕмĕре, А.Николаев летчик-космонавта асăнса ирттернĕ эстафетăра кăçал Кĕçĕн Таяпари пĕтĕмĕшле пĕлỹ паракан тĕп шкулта вĕренекенсем палăрнă. Вĕсем тĕп шкулсен ушкăнĕнче çĕнтернĕ. Командăна мала кăларассишĕн А.Голубев, М.Тарасова, А.Голубева, В.Семенов, Ф.Ярославлев, М.Скворцова вăй-хала шеллемен. Пĕтĕмĕшле пĕлỹ паракан вăтам шкулсен ушкăнĕ чи пысăкки пулнă _ 100 ытла команда хутшăннă эстафетăна. Елчĕкри вăтам шкулта вĕренекенсем 6-мĕш вырăна тухма пултарнă. Районсемпе хуласен администрацийĕсен командисен ушкăнĕнче, пĕлтĕрхи пекех, Елчĕксем 5-мĕш вырăн йышăннă. Командăшăн В.Баймушкин, А.Никифорова, Н.Карамаликов, И.Никонова, Н.Малышкин ăмăртнă.