15 июля 2009 г.
Иккĕмĕш çул уявлакан Çемье, юрату, шанчăклăх кунне районта анлă паллă тунă. Кашни ял тăрăхĕнчех чуна тыткăнлакан мероприятисем иртнĕ. Çемье çыхăнăвĕ, пĕр-пĕрне ĕмĕр-ĕмĕрех юратма тупа туни, пĕр-пĕрне шанни пурнăçра пысăк пĕлтерĕшлĕ. Ялсенче кĕмĕл, ылтăн туйччен килĕштерсе те тату пурăнакансем сахал мар. Тип Тимешри Смирновсен çемйинче Питравра ылтăн туй кĕрленĕ. Анатолий Андреевичпа Елена Михайловна пилĕк ача çуратса ỹстернĕ. Ачисем пурте аслă пĕлỹ илнĕ. Смирновсен çемйи ку тăрăхра пурăнакансемшĕн ырă тĕслĕх вырăнĕнче. Çемье, юрату, шанчăклăх кунĕнче Таяпа Энтринче пурăнакан О.Г.Миронова тата Н.П.Петров та ылтăн туя паллă тунă.