Публикации »

20 июня 2009 г.

Елчĕке Канаш енчен пырса кĕрсен тỹрех ку тăрăх улшăннине туятăн. Района йĕркеленĕренпе 75 çул тултарнине уявланă кун кунта физкультурăпа сывлăха çирĕплетекен "Улăп" комплекс çĕкленчĕ. Спорт керменĕ хута кайнăранпа ун çывăхĕнчи лаптăк та тирпейленчĕ. Иртнĕ çул çеç "Улăп" Спорт керменĕ вырнаçнă Юбилей урамĕнче кану паркĕ уçăлчĕ. Раççей кунне паллă тунă, Елчĕкре ĕçпе юрă тата спорт уявĕ _ Акатуй иртнĕ кун тата тепĕр пулăмпа палăрчĕ _ физкультурăпа сывлăха çирĕплетекен "Улăп" комплексĕн çурчĕ умĕнче шыв фонтанĕ хута кайрĕ. Çак вырăн Елчĕксемшĕн чăннипех кану вырăнĕ пулса тăчĕ. Халĕ пушă вăхăтра, каçхине фонтан умĕнче чуна килентерме пулать.