16 мая 2009 г.
Çамрăк армеецсен "Зарница" тата "Орленок" çарпа спорт вăййисем йăлана кĕнĕ тăрăх çулсеренех Кĕçĕн Таяпа вăрманĕнче иртеççĕ. Тахçан çак вăйăсене ашшĕ-амăшĕ хутшăннă, халĕ _ вĕсен ачисем. Кăçалхи çар вăййисем çу уйăхĕн 12-14-мĕшĕсенче пулнă. Унта районти тăхăр çул вĕренмелли тата вăтам шкулсенчи çамрăксем хутшăннă. Çамрăк армеецсен финалти вăййисене хутшăнакансене район администрацийĕн вĕрентỹпе çамрăксен политикин пайĕн ертỹçи Л.Левый, районти çар комиссарĕ С.Нестеров тата ыттисем саламланă. Çар вăййисен программинче çăмăл атлетсен эстафетисем, шывра ишессипе, пăшалтан тĕл перессипе, велосипедпа эрешлесе ярăнассипе, пушара сỹнтерессипе, çамрăк армеецсен виçĕ енлĕ ăмăртăвĕсем, конкурссем, викторинăсем иртнĕ. Çамрăк армеецсен ăмăртăвĕ çинчен тĕплĕнрех çитес номерсенче çырса кăтартăпăр.