Публикации » Ăса çивĕчлетет

26 ноября 2008 г.

Курнавăш шкулĕнчи нумай вĕренекенпе ашшĕ-амăшĕсемпе ял-йыш çеç мар, район та мухтанма пултарать. Пирĕн шкул тĕрлĕ конкурссене хастар хутшăнать. Вĕренỹ çулĕн 1-мĕш чĕрĕкĕ вĕçленчĕ. Çак вăхăтра республикăра, районта иртнĕ ăслăлăх ăмăртăвĕсенче палăрнă ачасен йышĕ ỹсрĕ. 11-мĕш класра вĕренекен Николай Семенов И.Я.Яковлев çуралнăранпа 160 çул çитнине халалласа республикăра иртнĕ "Яковлев вулавĕсем" конкурсра "Иван Яковлев" ятпа электронлă ĕç хатĕрлесе 1-мĕш вырăна, К.В.Ивановăн "Нарспи" поэмине пичетлесе кăларнăранпа 100 çул çитнине халалланă "Ачасен куçĕпе" конкурсра малти вырăна йышăнчĕ. 10-мĕш класра вĕренекен Александра Кирилловăпа Анна Корнилова (11-мĕш класс) "Нарспи" поэмăна пичетлесе кăларнăранпа 100 çул çитнине тĕпе хурса республикăра иртнĕ Интернет-тупăшура 2-мĕш вырăна тухрĕç, шкул чысне çỹле çĕклерĕç. 5-мĕш класра вĕренекен Евдокия Егорова Мускаври "Собеседник" издательство çурчĕ кăларакан "Ачасем валли _ кроссворд" журналăн 34-мĕш номерĕнчи кроссвордсене тупса çĕнтерỹçĕ ята тивĕçрĕ. 10-мĕш класра вĕренекен Люда Курчинапа Надя Васильева районта иртнĕ "Йывăç кунĕ" акцине хутшăнса 3-мĕш вырăна тухни те пире питĕ савăнтарать. Нумай ача çĕр-шыв шайĕнчи "Эрудиты планеты" ятпа иртекен студентсемпе шкул ачисен олимпиадине хутшăнать. Çак вăйăра пирĕн шкулти 6 ушкăн лайăх кăтартусемпе малтисен ретĕнче пырать. Хальхи вăхăтра эпир шкул чысне районта иртекен олимпиадăсене хỹтĕлеме хатĕрленсе шкулти олимпиадăсене хутшăнатпăр. Тĕрлĕ конкурссене хутшăнни пирĕн ăса çивĕчлетет, предметсене тарăнрах вĕренме хистет.