04 октября 2008 г.
Юпа уйăхĕн 1-мĕшĕнче _ Пĕтĕм тĕнчери ватăсен кунĕнче "Елчĕк ен" хаçат коллективĕ редакци тата полиграфи ветеранĕсене çулсеренех уява йыхравлать. Кăçал та ватăсем ăшă та уçă кăмăлпа пухăнчĕç редакцие. Çавра сĕтел хушшинчи шăкăл-шăкăл калаçу пĕр-пĕрне саламланинчен, иртнине аса илнинчен пуçланчĕ. Н.Алексеев тĕп редактор вĕсене кашнинех ырлăх-сывлăх, телей, канлĕ ватлăх сунчĕ. Чăн та, пĕр-пĕрне чылай вăхăт курман ватăсен аса илмелли, чуна уçса калаçмалли сахал мар. Çамрăк чухнехи çаврăнăçулăхне паянхи кун та çухатман И.Иноходов, Ю.Кузьмина, В.Яковлева, Е.Зайцева, Л.Трофимова, Е.Васильева, А.Синин, П.Михайлов, А.Тимофеев, И.Ишмуратов юрăсем шăрантарма ỹркенмерĕç. Уявпа кашниех кăмăллă юлчĕ.