Публикации » Криминаллă хроника

13 сентября 2008 г.

Авăн уйăхĕн 1-7-мĕшĕсенче район территорийĕнче 80 çынна административлă майпа явап тыттарнă. Çак шутран хулиганла пĕчĕк ĕçсемшĕн _ 1, обществăлла вырăнта спирт шĕвекĕ ĕçнĕшĕн _ 11, обществăлла вырăнта ỹсĕр çỹренĕшĕн _ 9, суту-илỹ йĕркине пăснăшăн _ 1, çул-йĕр йĕркине пăснăшăн _ 57 (вĕсенчен 3-шĕ руль умне ỹсĕрле ларнă), административлă ытти йĕркене пăснăшăн 1 çынна айăпланă. Çул-йĕр çинчи инкек Авăн уйăхĕн 1-мĕшĕнче 11 сехет тĕлĕнче Елчĕкри Пушкин урамĕнче ВАЗ-2105 маркăллă автомашина ỹпĕннĕ. Асăннă фактпа уголовлă ĕç пуçарма килĕшмен. Авăн уйăхĕн 1-мĕшĕнче Елчĕк _ Канаш çулĕ çинче "Сельхозхими" тĕлĕнче "Москвичпа" ВАЗ-21112 маркăллă автомашинăсем çапăннă. Авăн уйăхĕн 2-мĕшĕнче Кỹлпуç чарăнăвĕ çывăхĕнчи хĕреслĕ çул çинче УАЗ-3303 тата ГАЗ-3110 маркăллă автомашинăсем çапăннă. Икĕ водителĕ те вилнĕ. Асăннă фактсемпе тĕрĕслев ĕçĕсем пыраççĕ. Авăн уйăхĕн 4-мĕшĕнче Елчĕк _ Пăва автоçул çинче "КамАЗ" тата "Митсубиси-лансер" маркăллă автомашинăсем çапăннă. "Митсубиси-лансер" автомашина водителĕпе пассажирĕ вырăнтах вилсе кайнă. Авăн уйăхĕн 6-мĕшĕнче Елчĕк _ Патăрьел çулĕ çинчи Кавал ялĕ тĕлĕнче ВАЗ-21015 маркăллă автомашина ỹпĕннĕ. Авăн уйăхĕн 7-мĕшĕнче Комсомольскипе Елчĕк пăрăнкăçĕнчен иртсен Çуткỹл тĕлĕнче Дэо-эксперо маркăллă автомашина ỹпĕннĕ. Асăннă фактсемпе тĕрĕслев материалĕсем пухаççĕ. Çемьери хирĕçỹ Авăн уйăхĕн 2-мĕшĕнче 13 сехет тĕлĕнче Элекçей Тимеш ялĕнчи Ф. хăйĕн арăмне вĕлерессипе хăратнă. Асăннă фактпа уголовлă ĕç пуçарнă. Авăн уйăхĕн 5-мĕшĕнче 14 сехет те 40 минутра Аслă Елчĕкри Б. пĕр ял çыннине _ Ч.-на хĕнесе пĕтернĕ. Авăн уйăхĕн 5-мĕшĕнче 19 сехет тĕлĕнче Аслă Шăхальти С. мăшăрне хĕнесе пĕтернĕ. Асăннă фактсемпе тĕрĕслев материалĕсем пухаççĕ.