23 августа 2008 г.
Çурла уйăхĕн 18-мĕшĕнчен пуçласа авăн уйăхĕн 14-мĕшĕччен Чăваш Республикин территорийĕнчи хуласемпе ялсенче "Асăрханăр _ ачасем" профилактикăлла операци иртет. Чăваш Енри патшалăх автоинспекци çуран çỹрекенсемпе водительсене çак тапхăрта уйрăмах тимлĕхе ỹстерме ыйтать. Ачасен сывлăхĕпе пурнăçне упрасси, сыхласси аслисенчен, çав вăхăтрах водительсенчен те нумай килет. Хаклă водительсем! Çул-йĕр çинче тимлĕ пулăр. Шкулсенчи занятисем умĕн тата уроксем хыççăн уйрăмах. Пĕлỹ çурчĕсен умĕнче, çуран çỹрекенсем çул урлă каçакан вырăнсенче хăвăртлăха чакарма ан манăр. Вĕренекенсен хушшинче шкула кăçал пуçласа ура ярса пусакансем, çул-йĕрпе хăйсем тĕллĕн пуçласа утакансем, çул-йĕр правилисемпе паллашса ĕлкĕрейменнисем те пуррине асрах тытăр. Аслисем, ашшĕ-амăшĕ! Ачăрсене çул-йĕр правилисемпе паллаштарма ан манăр. Çакă вĕсене хăрушсăрлăхпа тивĕçтерĕ, вĕсен пурнăçне упрама пулăшĕ.