23 августа 2008 г.
"Яманчурино" ОООра 647 гектар çинчен пĕрчĕллĕ тата пăрçа йышши культурăсем пухса кĕртмелле. Ĕç пур çĕрте те кал-кал пырать. В.Сергеев комбайнер ăнса пулнă тыр-пула вырать. А.Марковпа А.Денисов комбайнерсен экипажĕсем тĕш тырă çапса тĕшĕлеççĕ. Ю.Комиссаров водитель комбайнсем патĕнчен йĕтем çине тырă турттарать. Ю.Егоров машинист тырă акакан агрегатсене пĕр тикĕс ĕçлеттерет. Ĕçе икĕ сменăпа йĕркеленĕ. В.Маркова, М.Карсакова, Л.Маркова рабочисем кашни çулах тырă алланă çĕрте чунне парса вăй хураççĕ. Комбайнсем хыççăнах механизаторсем улăма хушăка хываççĕ. В.Ермолаева, Г.Беловолосова, Р.Немцева, С.Матвеева, М.Яковлева хастар ку ĕçре. Пушаннă анасем çине "хурçă утсем" кĕреççĕ. И.Сабитов, Н.Васильев, Н.Краснов трактористсем кĕрхи çĕртме сухи тăваççĕ. Хальлĕхе кĕрхи культурăсем акма 120 гектар çĕр хатĕрленĕ. Çак кунсенче тырра пĕтĕмпех пухса кĕртес тесе ăшталанаççĕ уй-хир ĕçченĕсем.