09 августа 2008 г.
Çул-йĕр çинче хăйсене çăмăлттайла тытакансен йышĕ, шел пулин те, чакмасть. Вĕсене пула вара пĕр айăпсăр çынсем сусăрланаççĕ е пурнăçран уйрăлаççĕ. Кăçалхи 7 уйăхра район территорийĕнчи çул-йĕрсем çинче пурĕ 13 авари пулнă, вĕсенче 4 çын вилнĕ, 12-шĕ суранланнă. Иртнĕ çулта çак вăхăтра 6 авари регистрациленĕ, вĕсенче 1 çын вилнĕ, 7-шĕ аманнă. Аварисен тĕп сăлтавĕ _ водительсем çул-йĕр йĕркисене пăхăнманнинче. Тепĕр хăрушă пулăм вăл _ чылайăшĕ права пулмасан та руль умне ларни. 7 уйăхра район территорийĕнче çакăн евĕр 28 факт тупса палăртнă. Çакна та палăртмалла, кăçалхи 13 аварирен 3-шĕ права илмесĕрех руль умне ларнă водительсен айăпĕпе пулнă. Çак 3 аварире 2 çын вилнĕ, пĕри аманнă. Çурла уйăхĕн 2-мĕшĕнче Елчĕк-Пăва автоçул çинчи (Елчĕкрен икĕ километр иртсен) авари те çак сăлтавпах пулнă. Елчĕк ялĕнчи Оксана Валерьевна Кузьмина права илмесĕрех автотранспортпа (ăна техника тĕрĕслевĕ витĕр те кăларман) çỹрени хăрушă инкекпе вĕçленнĕ _ вăл çул хĕррипе пыракан велосипедиста çапса хăварса вилмеллех амантнă. Прависене туртса илнĕ пулсан та руль умне ларакансене каçару пулмĕ. Кăçалхи 7 уйăхра çеç çакăн евĕр 35 водителе административлă майпа арестленĕ.