06 августа 2008 г.
Исемпел ялĕнче çуралса ỹснĕ Олег Захаров спортсмен, тренер кашни çул тăван ял халăхне савăнтарма ял уявĕ туса парать. Олег самбо тата джау-джист мелĕсемпе кĕрешессипе пĕрре анчах мар Раççей тата тĕнче чемпионĕ ятне илме тивĕç пулнă. Олег тăван ялшăн, пĕрле выляса ỹснĕ тус-юлташĕсемшĕн нимĕн те шеллемест. Кашнинче ял уявне чăваш эстрадин çăлтăрĕсене илсе килет, спорт вăй-йисем ирттерет. Ял ĕçченĕсем çак уявра кулленхи пурнăçран пăрăнса чăннипех те канаççĕ, савăнаççĕ. Çакă вара, ман шутпа, чи пысăк ырă ĕçсенчен пĕри. Çавăн пекех Энтепе ялĕнче çитĕннĕ Александр Андреев, хальхи вăхăтра производство организаторĕ, нумаях пулмасть культура çурчĕ, библиотека валли телевизор, DVD парнелерĕ. Александр Федорович тăван ялне мала ярассишĕн тăрăшать, хăйĕн ентешĕсемпе яланах интересленет, май килнĕ таран пулăшса пырать. Тăван ялне манманни, ял халăхне хисеплени Александрăн ырă кăмăлне палăртать. Ырă тунипе çын аманмасть, сăвап кăна пулать. Кашни çын хăйĕн пурнăçĕнче мĕнле те пулсан ырă ĕç тума тăрăшать. Кăçал вара çавăн пек çынсен шучĕ самаях ỹсрĕ.