10:08 23 декабря 2015 г.
Раççейре Литература, Чăваш Енре Константин Иванов çулталăкĕ хупăннине халалласа Наци библиотекинче «Вулакан Чăваш Ен» форум иртнĕ. Унта Чăваш Республикин Пуçлăхĕ Михаил Игнатьев та хутшăннă.
Ун умĕн Наци библиотекин çĕнĕ корпусĕн лапамĕнче З.М.Таланцевпа 19-мĕш ĕмĕрти ытти мецената хисеп туса асăну композицийĕ уçнă.
Çакна палăртмалла: Литература тата Константин Иванов çулталăкĕ литературăпа кăсăкланассине, вулав культурине ÿстерессине самай çĕклени сисĕнчĕ. Иккĕленÿ çук: çĕр-çĕр, пин-пин çын классиксен чи лайăх произведенийĕсене алла тытма, халĕччен вуламан кĕнекесемпе паллашма вăхăт тупнах.
Константин Иванов çулталăкĕ поэтăмăрăн вилĕмсĕр «Нарспи» поэмине тепĕр хут анлăн пропагандăланипе çыхăннă. «Нарспие» вулатпăр» проект чăннипех çулталăкри халăх проекчĕ пулса тăчĕ. Вăл чăвашла çеç мар, вырăсла, çавăн пекех тĕнчери халăхсен чĕлхисемпе янăрарĕ. Вăрăмхăвари Лиза Казначеева та ăна вулассипе ырă ят çĕнсе илчĕ.
ЧР культура министрĕн тивĕçĕсене пурнăçлакан Константин Яковлев форумăн пленарлă ларăвне хутшăннисене Литературăпа Культура çулталăкĕсенче пурнăçланă ĕçсемпе паллаштарнă.
Республикăра Литература тата Констанин Иванов çулталăкне ăнăçлă ирттернĕ: 5600 мероприяти йĕркеленĕ, унта 211 пин ытла çын хутшăннă. Библиотекăсенче пысăк пĕлтерĕшлĕ 50 яхăн проекта пурнăçа кĕртнĕ. Çитес çулсенче Чăваш Енĕн яллă вырăнĕсенче 50 культура учрежденийĕ тумалла, вĕсенчен виççĕшне çитес çул çĕклеме пуçламалла.
Чăваш Республикин Пуçлăхĕ Михаил Игнатьев чăн-чăн пултаруллă çынсем историре хăйсен ятне, ĕçне хăварнине палăртнă. «Чĕлхе, истори, культура, ăс-хакăл пахалăхĕсемпе халăх йăли-йĕркисем этемлĕхĕн никĕсĕсен никĕсĕ пулса тăраççĕ. Çакна республикăра пурăнакансем лайăх ăнланаççĕ. Литература çулталăкĕ наци культурипе йăли-йĕркисене тарăнрах тĕпчеме пулăшĕ. Паянхи çăмăл мар лару-тăрура та культура пахалăхĕсем малти вырăнта», - тенĕ Михаил Васильевич.
Михаил Игнатьев шухăшĕпе - Литература çулталăкĕ вĕçленме пултараймасть. Кĕнеке çынпа яланах юнашар. Вăл çавăн пекех Чăваш кĕнеке издательстви ячĕпе ырă сăмах каланă: 2015 çулта издательство социаллă пĕлтерĕшлĕ 129 кĕнеке кăларнă.
Форумра республика Пуçлăхĕ культура тытăмĕнче нумай çул тăрăшса ĕçлекенсене, библиотека ĕçне аталантарассинче тунă çитĕнÿсемшĕн хисеплĕ ятсемпе, Тав çырăвĕсемпе чысланă.
ЧР Культура министерстви кăçал Константин Иванова тата унăн пултарулăхне халалласа илемлĕ произведенисен регионсем хушшинчи конкурсне ирттернĕ. Форумра унăн çĕнтерÿçисене те чысланă.
Культура çулталăкĕнчи ырă йăла - культура учрежденийĕсене автомобиль уççи парнелесси - çуралнăччĕ. Кăçал автомобиль уççисене илекенсем республикăри ачасемпе çамрăксен библиотеки тата Чăваш патшалăх пукане театрĕ пулчĕç.
Литература çулталăкĕ вĕçленчĕ. Ăна Раççей кино çулталăкĕ ылмаштарĕ, Чăваш Енре 2016 çул Ĕç çынни çулталăкĕпе те палăрĕ.
Форум секцисене пайланса ĕçленĕ. Пирĕн районти библиотекарьсем «çавра сĕтеле» активлă хутшăннă.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»