09:18 23 декабря 2015 г.
Çĕнĕ çул уявĕ çитме шутлă кунсем юлчĕç. Кашни çемьере савăнăçлă, кĕтнĕ уяв вăл. Анчах шăпах çав вăхăтра инкек тухас хăрушлăх калама çук пысăк. Пушартан сыхланмалли йĕрке тăрăх, обществăлла вырăнсенче уяв ирттернĕ чухне ертÿçĕ пур енĕпе те яваплă.
Çĕнĕ çул уявне савăнăçлă та инкексĕр кĕтсе илес тесессĕн чи малтанах чăрăша çирĕп никĕс çине лартмалла тата тухмалли алăк умĕнче нимĕн те пулмалла мар. Çавăн пекех чăрăш тураттисем стенапа маччаран 1 метртан кая мар пулмалла. Чăрăша илемлетнĕ çĕрте гирляндăсемпе тата иллюминацисемпе усă курма юрамасть. Уява шкулта, клубра ирттернĕ чухне инкекрен асăрханас тесен çакна асра тытмалла:
- пиротехника япалисемпе, прожекторсемпе, уçă çулăмпа тата çуртасемпе усă курма юрамасть;
- чăрăша мамăкпа илемлетмелле мар;
- мероприяти умĕн тата ун вăхăтĕнче çулăмлă представленисем тата пушар хăрушлăхĕ кăларакан ĕçсем тумалла мар;
- тенкел речĕсен хушшине пĕчĕклетме, унта хушма тенкелсем лартма та юрамасть;
- мероприяти вăхăтĕнче пĕтĕм çутта сÿнтермелле мар;
- уява ирттернĕ çĕрте çынсем нормăран ытлашши пулмалла мар.
Сăмах май каласан, пиротехникăна 16 çул тултарман ачасене пачах сутма юрамасть. Ăна пÿлĕмсенче усă курма юраманни çинчен те самантлăха та манмалла мар.
Уяв вăхăтĕнче пушар сиксе тухсан çийĕнчех 01 е кĕсье телефонĕпе 112 номерпе шăнкăравламалла. Çавăн пекех инкек пирки кÿршĕсене пĕлтермелле, çынсене урама илсе тухмалла, пушар хурал пайне ăçта çуннине, пушар çывăхĕнче хăрушă япаласем /газ баллонĕсем, лак-сăрă, пиротехника/ пуррине те каламалла.
Пушартан сыхă тăрăр. Уява инкексĕр кĕтсе илсе ирттерсе ярар.
А.САЙКИН,
пушар асăрхавĕн районти уйрăмĕн ертÿçи.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»