14:39 25 ноября 2015 г.
Кăтартусем курăмлă, ĕçченсем маттур
Налук службинче ĕçлекенсем ноябрĕн 21-мĕшĕнче хăйсен професси уявне паллă турĕç. Кăçалхи уяв вара ыттисенчен пĕлтерĕшлĕрех - Раççейре налук службине туса хунăранпа 25 çул çитрĕ. Çак вăхăтра служба тĕрекленсе вăй илме пултарнă.
Историе аса илес пулсассăн, чи малтанах кашни районтах налук инспекцийĕ пулнă, 2000 çултан 3-4 районтине пĕрлештерсе пĕрре туса хунă. Сăмахран, Комсомольскинчи 2-мĕш номерлĕ налук инспекцийĕн ĕçченĕсем Патăрьел, Елчĕк, Шăмăршă, Комсомольски районĕсемпе ĕçлеççĕ. Тăватă районти тĕрлĕ организацисемпе учрежденисем, уйрăм предпринимательсем, уйрăм çынсем налуксене вăхăтра хывнине тĕрĕслеççĕ. Налук тÿлессинчен пăрăнакансене вырăна çитсе тупса палăртаççĕ. Çак тĕллевпе вĕсем тăтăшах тĕрлĕ рейдсем йĕркелеççĕ. Тăрăшса ĕçленине ÿсĕмсем çирĕплетеççĕ. Инспекцинче тăрăшакансем савăнăçлă уява чăннипех те лайăх кăтартусемпе кĕтсе илчĕç. 2-мĕш номерлĕ налук инспекцийĕ - республикăри чи лайăх та тухăçлă ĕçлекенсенчен пĕри. Çитĕнÿсемпе, ĕç-хĕлпе инспекци начальникĕ Вячеслав Александрович Антонов паллаштарчĕ.
- Инспекци кăçал çеç мар, чылайранпа лайăх ĕçлекенсен йышĕнче. Пирĕн кăтартусем çулран-çул ÿссех пыраççĕ. Сăмахран, 2015 çулхи 10 уйăхра федераци бюджетне 4 районпа пурĕ 514 миллион та 550 пин тенкĕ хывнă. 10 уйăхри кăтартусемпе эпир чи лайăх ĕçлекенсен йышĕнче. Елчĕк районĕпе илес пулсассăн, федераци бюджетне 5781 пин тенкĕ, республика бюджетне - 43058 пин тенкĕ, вырăнти бюджета 49491 пин тенкĕ хывнă. Пĕлтĕрхипе танлаштарсан 110,8 процент. Кунта, паллах, налук инспекцийĕн ĕçченĕсем те, налук тÿлекенсем те пĕр-пĕринпе килĕштерсе ĕçленине палăртмалла.
Пирĕн ÿсĕмсем чи малтанах налуксене мĕнле хывса пынинчен килеççĕ. Çавна май чи лайăх ĕçлекен организацисемпе предприятисене, уйрăм предпринимательсене палăртса хăвармалла. Акă, 2015 çулхи 10 уйăхра «Промсервис» НПО ЗАО 5 миллион та 696 пин тенкĕ, «Прогресс» акционерсен хупă обществи 4 миллион та 84 пин, «Яманчÿрелти сельхозхими» ОАО 1 миллион та 738 пин тенкĕ хывнă. Çавна май ыттисен вĕсенчен тĕслĕх илесчĕ. Шел пулин те, налуксене вăхăтра хывман организаци те чылай-ха. Хăшĕ-пĕрисем вара вăрттăн ĕçлеççĕ, саккуна пăхăнмаççĕ. Кун пек чухне вырăна çитсе тĕрĕслевсем ирттерни пулăшать. Ку енĕпе камераллă тĕрĕслев уйрăмĕн инспекторĕсем организацисене, уйрăм предпринимательсене тĕрĕслеççĕ. Çавна май кăçал камераллă тĕрĕслевсене пула тÿлемелли налуксен 95 процентне шыраса илнипе эпир республикăри инспекцисем хушшинче 1-мĕш вырăн йышăнатпăр.
- Вячеслав Александрович, çитĕнÿсем чăннипех те курăмлă. Апла инспекцинче ĕçне чунтан парăннă çынсем ĕçлеççĕ пулĕ...
- Коллективра 50 çын тăрăшать. Вĕсенчен чылайăшĕ кунта нумай çул ĕçлет. Налук службипе пĕрле ĕçе кÿлĕннисем те пур, вĕсем - эпĕ тата информаципе аналитика уйрăмĕн начальникĕ Вера Лукиянова. Çавăн пекех пĕтĕмĕшле пулăшу уйрăмĕн начальникĕ Татьяна Чапрасова, ертсе пыракан инспектор Маргарита Кириллова 24 çул ытла, тухса çÿрекен уйрăмăн начальник ĕçĕсене пурнăçлакан Наталья Ильина, тĕп патшалăх инспекторĕ Алевтина Николаева 23 çул ытла, инспекци начальникĕн çумĕсем Геннадий Филиппов 22 çул, Надежда Поликарпова 21 çул, информаципе аналитика ĕçĕсен уйрăмĕн начальникĕн çумĕ Валерий Лисицын, Галина Русская специалист эксперт, Зиле Кудряшова 21 çул тăрăшаççĕ. Вĕсем - пысăк опытлă специалистсем. Çавна май тин çеç ĕçе кÿлĕнекен çамрăксене вĕрентсе пыраççĕ, ĕçлеме хăнăхтараççĕ.
- Эпĕ пĕлнĕ тăрăх, инспекци ĕçченĕсем обществăлла ĕçре те хастар. Тĕрлĕ спорт ăмăртăвĕсене, конкурссене, фестивальсене хутшăнма вăхăт тупаççĕ.
- Коллективра тăрăшакансем çав тери хастар, маттур, пултаруллă. Хăйсен ĕçне тивĕçлĕ туса пынă вăхăтрах спортзала çÿресе ÿт-пĕвне тĕреклетме, тĕрлĕ ăмăртăва хутшăнса ăсталăхне ÿстерме ĕлкĕреççĕ. Сăмахран, Раççей налук служби кашни çулах инспекци ĕçченĕсем хушшинче хĕллехи тата çуллахи спартакиада ирттерессине йăлана кĕртнĕ. Кăçал ĕçченсем 14 тĕрлĕ спорт ăмăртăвне хутшăннă. Йĕлтĕрпе эстафета чупса, канат туртса 3-мĕш вырăнсене тухнă. Çавăн пекех шашкăлла, шахматла выляссипе те кăтартусем япăх мар. Маттур спортсменсем пирки уйрăммăн каласа хăварас килет. Зуфар Тимаев Чăваш Республикин тата Атăлçи округĕн чысне Раççей налук службисен Мускав хулинче йĕркеленĕ спартакиадинче хÿтĕленĕ. Дмитрий Хлебников, Владимир Осипов _ республикăри ăмăртусен çĕнтерÿçисем. Культура мероприятийĕсенче те пултаруллă ĕçченсем. Акă, профсоюз комитечĕн председателĕ Ирина Басникова кăçал «Чи лайăх налук инспекторĕ» республикăри конкурса хутшăнчĕ. Лайăххисен йышне кĕме пултарчĕ. Раççей налук служби 25 çул тултарнине халалласа инспекци ĕçченĕсем флешмоб конкурсне хутшăнчĕç. Ĕçпе канăва яланах çÿллĕ шайра йĕркелеме тăрăшнă, тăрăшатпăр та.
- Вячеслав Александрович, 25 çулхи уява мĕнле кăмăл-туйăмпа кĕтсе илтĕр;
- Раççей налук служби йĕркеленнĕренпе 25 çул çитни маншăн пысăк уяв. Эпĕ пĕрремĕш кунранах ĕçе кÿлĕннĕ. Çавна май служба аталанăвĕ пĕтĕмпех куç умĕнче. Кăçалхи уява Раççейре те анлăн паллă тăваççĕ. Республикăра ноябрĕн 23-мĕшĕнче уявларĕç. Чи пултаруллисене Хисеп грамотисемпе, Тав çырăвĕсемпе чысларĕç. Мускав хулинче РФ Президенчĕ Владимир Путин Раççейри пур инспекци начальникĕсемпе тĕл пулу ирттерчĕ.
А.ЕФРЕМОВА.
Сăнÿкерчĕкре: республика Пуçлăхĕ Михаил Игнатьев налукçăсемпе.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»