12:07 25 ноября 2015 г.
Тунтикун район администрацийĕн пуçлăхĕ Николай Миллин райадминистрацин структура подразделенийĕсен, ял тăрăхĕсен, предприятисемпе организацисен ертÿçисемпе канашлу ирттернĕ.
Вăл эрне итогĕсене пĕтĕмлетрĕ, Лаш Таяпа, Аслă Елчĕк ял тăрăхĕсенче ял урамĕсене патшалăх пулăшнипе хытарнă çул сарасси çинче уйрăммăн чарăнса тăчĕ. Иртнĕ эрнере вăл Лаш Таяпа, Яманчÿрел, Аслă Елчĕк ялĕсенче район администрацийĕн тата подряд организацийĕн работникĕсемпе пĕрле пулнă, çул-йĕр тăвас ĕçпе, унăн пахалăхĕпе паллашнă. Лаш Таяпари виçĕ урама, 920 метр çула лайăх çанталăкра сарса хытарнă. Йĕркеллĕ çул пулни пурне те савăнтарать. Çавна май кунти урамри ăпăр-тапăра пуçтарттарнă, хăйсен ирĕкĕпе лартнă хуралтăсене те пăснă. Ялăн тепĕр урамне те вак чул сарса хытарма палăртнă. Çурчĕсем чăнах та кермен пек, урамне вара кĕрсе тухма çук. Урамра мунчи те ларать, ăпăр-тапăрĕ те чылай купаланса выртать иккен. Вĕсем пурте çул тума чăрмантараççĕ. Çул пулманран хĕлле урама юр тултарать, кĕрсе тухма çук.
Яманчÿрелте те 1080 метра тăсăлакан икĕ урамра çул тăвасси вĕçленсе пырать. Ĕçе «Стройкомфорт» ООО пурнăçлать. «Çула çулла тăваççĕ, кунта вара юр çинче. Тен, çул-йĕр строителĕсем çул сармалли эпир пĕлмен çĕнĕ меслет шутласа тупнă;» _ çакăн пек хакларĕ вĕсен ĕçне район администрацийĕн пуçлăхĕ. Аслă Елчĕкре ял урамĕсене вак чул тата асфальт сарса хытарасси чылай çул каяллах пуçланнă. Çак ĕçе кăçал та пурнăçланă. Виçĕ урама 1965 метр çул сарнă.
Чăваш Республикин Экономика аталанăвĕн министерстви 2008 çултанпа муниципалитет районĕсемпе хула округĕсем тата ял тăрăхĕсем хушшинче экономика ăмăртăвĕсем йĕркелет. Районсем хушшинче Елчĕк районĕ тăтăшах малтисен ретĕнче. 2013 çул итогĕсемпе район пĕрремĕш вырăн йышăннăччĕ, укçан премие тивĕçнĕччĕ. Унпа пĕлтĕр Елчĕкри Пĕрремĕш май урамне тата ытти çĕрте вак чул сарса хытарчĕç. 2014 çул итогĕсемпе район республикăра иккĕмĕш вырăн йышăннă. Район администрацийĕн пуçлăхĕн çумĕ _ финанс пайĕн начальникĕ Галина Анисимова 2014 çулхи экономика ăмăртăвĕн тата вырăнти хăйтытăмлăх органĕсен ĕçĕн эффективлăхĕн кăтартăвĕсемпе паллаштарчĕ.
Халăхран туянакан сĕт пахалăхĕ çинчен выльăх-чĕрлĕх чирĕсене хирĕç кĕрешекен станци начальникĕ Ирина Николаева каласа пачĕ. Хальхи вăхăтра уйрăм хуçалăхсенче 2338 ĕне тытаççĕ. Çав шутран икĕ-виçĕ ĕне усракансем те пайтах. Пĕтĕмпе 1464 уйрăм хуçалăх предпринимательсене, сĕт-çу завочĕсене продукци сутать. Сĕт пахалăхне ÿстерес тĕлĕшпе ветстанци работникĕсем профилактика ĕçĕсене нумай туса ирттереççĕ, сывă мар ĕнесене тупса палăртаççĕ. Ирина Николаева пĕлтернĕ тăрăх, ветеринари работникĕсем сĕт пуçтаракансем, сĕт сутакансем умĕнче сĕт пахалăхне палăртма 5600 проба илнĕ. Сĕте белок, çу хисепĕ, йÿçĕхеслĕх, шыв хушаслăх енĕпе тĕрĕсленĕ. Юлашки тĕрĕслевсем, маларах ирттернисемпе танлаштарсан, лару-тăру лайăх енне улшăнса пыни çинчен калаççĕ. Сĕтри çу хисепĕ 4,2 процентран кая мар. Сĕте шыв хушакансем те сахалланнă. Анчах халăхран пухакан сĕт хакĕ питĕ вăраххăн ÿсет. Халĕ унăн 1 килограмне 17 тенкĕпе туянаççĕ. Район администрацийĕн пуçлăхĕ Николай Миллин çак хак сĕт сутакансене тивĕçтерменнине палăртрĕ. Сăмах май, Елчĕкри сĕт-çу завочĕ сĕте халăхран 19 тенкĕпе, хуçалăхсенчен 21 тенкĕпе туянать. Хамăр патăмăрти завода пани пуриншĕн те усăллă: хакĕ те пысăкрах, налук укçи те района пуçтарăнать.
Районти социаллă пĕлтерĕшлĕ тата халăх нумай пухăнакан объектсене терроризм акчĕсенчен хÿтĕлесси пирки район администрацийĕн ятарлă программăсен пайĕн эксперт специалисчĕ Виталий Рыбкин тухса калаçрĕ, ку енĕпе сыхланмалли майсене аса илтерчĕ.
Канашлура район пурнăçĕпе çыхăннă ытти ыйтусене те сÿтсе явнă.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»