09:19 12 сентября 2015 г.
Информаци коммуникацийĕсен «Рейтинг» центрĕ кăçалхи июль-август уйăхĕнче Раççей субъекчĕсен пуçлăхĕсем мĕнле ĕçленине тĕпченĕ. Чăваш Енĕн Пуçлăхĕн тивĕçĕсене вăхăтлăх пурнăçлакан Михаил Игнатьев рейтингĕ 4 йĕрке хăпарнă, 25 вырăнтан 21-мĕш вырăна йышăннă. Пирĕн районта пурăнакансем çак çитĕнĕве хак параççĕ:
Геннадий ТУМАНОВ, Çĕнĕ Эйпеç ялĕн старости:
- Чăваш Республикин Пуçлăхĕн тивĕçĕсене вăхăтлăх пурнăçакан Михаил Игнатьев ĕçне кура çак сума тивĕç те. Республикăн юлашки çулĕсенчи çитĕнĕвĕнче унăн тÿпи пысăк. Вăл ĕçлеме пуçăннăранпа çĕнĕрен те çĕнĕ шкулсем, ача сачĕсем, сывлăх учрнежденийĕсем хута кайрĕç. Çулсене сараççĕ, юсаççĕ, тĕрлĕ инвестици проекчĕсем пурнăçа кĕреççĕ. Акă, кăçал çеç Яманчÿрелте модульлĕ фельдшерпа акушер пункчĕ уçăлчĕ, Лаш Таяпари урамсене куçăмлă сийлĕ автоçул сарчĕç, культура çурчĕн тăррине витрĕç... Çаксем Михаил Игнатьевăн ят-сумне çĕклеççĕ те.
Василий ЧЕРНОВ, Аслă Елчĕк ялĕн хисеплĕ гражданинĕ:
- Пирĕн республика Раççей шайĕнче малта пыракансен ушкăнне кĕни, хăйĕн ят-сумне ÿстерни - Михаил Игнатьев Чăваш Енĕн çыннисемпе çыхăнса, ăнланса, вĕсен шухăш-кăмăлне тĕпе хурса ĕçленин результачĕ. Юлашки çулсенче республикăра кашни отрасльтех - промышленноçра та, ял хуçалăхĕнче те, вĕренÿре те, сывлăх сыхлавĕнче те, культурăра та, строительствăра та, халăха социаллă пулăшу парассинче те ÿсĕмсем палăраççĕ. Юлашки 5 çулта республикăра 100 яхăн, 130 миллиард тенкĕлĕх инвестици проекчĕсене пурнăçа кĕртме пултарни те Михаил Игнатьев халăхшăн тăрăшнине çирĕплетет. Унăн рейтингĕ ÿссе пыни пирĕншĕн кăмăллă.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»