15:34 07 сентября 2015 г.
Иртнĕ эрнери спорт пурнăçĕнчи чи паллă событисенчен пĕри Чăваш Енĕн спорт прессин фестивалĕ - СССР космонавт летчикне, икĕ хут Совет Союзĕн Геройне А.Г.Николаева асăнса «Советская Чувашия» хаçат парнисене çĕнсе илессишĕн çăмăл атлетсен 77-мĕш эстафета чупăвĕ пулчĕ. Вăл Шупашкарти Тĕп стадионта иртрĕ. Ăмăртăва уçма Чăваш Республикин Пуçлăхĕн тивĕçĕсене вăхăтлăх пурнăçлакан Михаил Игнатьев та хутшăнчĕ. Çăмăл атлетсен эстафета чупăвне хутшăнакансене саламласа вăл спорт çынсене пĕрлештернине, пĕтеçтернине, лайăх кăмăл-туйăм парнеленине палăртрĕ. «Чăваш Енĕн патшалăх политики спорта аталантарассипе, халăха сывă пурнăç йĕркине хăнăхтарассипе, наци сывлăхне çирĕплетессипе çыхăннă. Çак тĕллевсене пурнăçлама патшалăхăн тĕрлĕ программисене йышăннă, çак тĕллевпех спортăн нумай объекчĕсене ĕçе кĕртеççĕ, массăллă спорт акцийĕсем йĕркелеççĕ. Паян кунта килнĕ, хăйĕн тĕслĕхĕпе ыттисене спорт занятийĕсене явăçма хавхалантаракан кашни çынна тав тăватăп», - терĕ вăл.
Олимп чемпионĕ, çăмăл атлетика енĕпе Раççей сборнăй командин тĕп тренерĕ Юрий Борзаковский Чăваш Республикинче физкультурăпа спорта аталантарассишĕн çĕршывăн ытти регионĕсемпе танлаштарсан, питĕ пысăк ĕç тунине палăртрĕ. Каярахпа журналистсен ыйтăвĕсене хуравласа çапла хушса хучĕ: «Май килнĕ чухне Республика Пуçлăхĕн тивĕçĕсене вăхăтлăх пурнăçлакан Михаил Игнатьева, республикăра пурăнакансене çĕршывăн çăмăл атлетика енĕпе пĕрлештернĕ командине пĕтĕм сезона кунта хатĕрленме майсем туса панăшăн пĕтĕм чĕререн тав тăватăп. Чăваш Республикинче нумай пысăк ăмăртусем çÿллĕ шайра иртрĕç. Нумаях пулмасть республика çăмăл атлетика енĕпе Европăн команда чемпионатне йышăнчĕ. Ăна вăл тĕлĕнсе каймалла лайăх ирттерсе ячĕ. Ют çĕршывсенчен килнисем тĕлĕнсе кайнă. Чемпионата йĕркелессипе, хăнасене йышăнассипе кун пеккине курман теççĕ пурте. Михаил Васильевич спорта аталантарассишĕн нумай ĕç тăвать».
Ăмăртăва уçнă хыççăн Михаил Игнатьев Чăваш Республикинчи ĕç тăвакан влаç органĕсен ертÿçисемпе, ЧР Патшалăх Думин депутачĕсемпе, районсемпе хуласен администрацийĕсен ертÿçисемпе, паллă спортсменсемпе пĕрле VIP-чупăва хутшăнчĕ. Унта пирĕн район администрацийĕн пуçлăхĕ Николай Миллин та пулчĕ.
Иртнĕ çулхи чупура пирĕн районти çăмăл атлетсем пысăк çитĕнÿсемпе савăнтарнăччĕ. Кăçал та эпир Елчĕк район спортсменĕсенчен лайăх кăтартусем кĕтнĕччĕ. Шел, пысăк ăнăçусем пулмарĕç хальхинче. Кĕçĕн Таяпари тата Хăвăлçырмари пĕтĕмĕшле пĕлÿ паракан тĕп шкулсенчи çамрăк спортсменсем 4 тата 6-мĕш вырăнсене йышăнчĕç. Михаил Скворцов воспитанникĕсем виççĕмĕш вырăн йышăннă командăран темиçе çеккунт анчах кая юлчĕ. Çак темиçе çеккунта пулах Елчĕкри вăтам шкул команди те призерсен йышне кĕреймерĕ. Пирĕн командăри Данил Смирнов, Максим Цыганов, Антон Цыганов тата командăри ытти çамрăк спортсменсем питĕ тăрăшсан та. Сăлтавĕсем вĕсенчен килмерĕç. Вăтам шкулсен ушкăнĕнче 50 яхăн команда вăй виçрĕ. Çăмăл атлетсем виçĕ ушкăна пайланса чупрĕç. Малтанхи ушкăна пĕлтĕр каярах юлнă командăсем кĕчĕç. Иккĕмĕшне - 2014 çулта 15-мĕш вырăнтан каярах йышăннисем. Чи вăйлисем вара юлашкинчен чупрĕç. Иртнĕ çул 15-мĕш вырăн йышăннă Елчĕк шкулĕн команди иккĕмĕш ушкăнра чупрĕ. Кунта вăл пĕрремĕш участникран пуçласа 10-мĕш участник чупичченех /кашни командăран пилĕк каччăпа пилĕк хĕр ăмăртрĕ/ ыттисене чылай кая хăварса финиша пĕрремĕш çитрĕ. Стадионти диктор Елчĕксен кăтартăвĕ чи лайăххине пĕлтерчĕ. Анчах виççĕмĕш ушкăнра чупнă командăсенчен 4-шĕ пирĕннисен кăтартăвне çĕнетрĕ. Финиша вĕсем пĕр-пĕринчен пĕр е икĕ утăм юлса çитрĕç. Елчĕк шкулĕн команди пĕрремĕш вырăн йышăннă командăран 6 çеккунт çеç каярах юлчĕ. Енчен те Елчĕксем юлашки ушкăнра чупнă пулсан вĕсем малти виçĕ команда йышне кĕртеçĕх.
«Советская Чувашия» хаçат парнисене çĕнсе илессишĕн эстафета чупăвĕ кĕркуннен малтанхи уйăхĕсенче иртет пулин те, кăçалхи пек çумăрлă кун сайра тĕл пулать. Анчах спортсменсене çакă хăратмарĕ.
Чупăва район администрацийĕн тата Лаш Таяпари вăтам шкулсен командисем те хутшăнчĕç. Райадминистрацин команди 22 район хушшинче 6-мĕш вырăн йышăннине япăх тесе калама çук.
Н.АЛЕКСЕЕВ.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»