10:08 17 июля 2015 г.
Чăваш Республикин Ялхуçалăх министерствин официаллă операторĕ, ÿсентăран лаптăкĕсенчи çумкурăка тата тĕрлĕ чир-чĕре пĕтерме пулăшакан препаратсемпе тивĕçтерекен Çĕнĕ Шупашкарти «Восток» ООО республикăн кăнтăр зонăри аграрисен семинар-канашлăвне пирĕн районта ирттерни ахальтен мар.
Хăйĕн тивĕçне туллин тата пахалăхлă пурнăçланипе çак çулсенче пысăк ят-сум сĕнсе илнĕ «Восток» ООО хальхи вăхăтра республикăри 50 яхăн ял хуçалăх предприятине, хресчен /фермер/ хуçалăхĕсене /вĕсен хисепĕ тата ытларах/ çумкурăкран тата тĕрлĕ чир-чĕртен хăтăлма пулăшакан препаратсемпе тивĕçтерет. Çав шутра пирĕн районти «Нива» агорфирма» ООО, «АСК-Яльчики» ООО, «Победа» ООО, «Эмметево» ООО, Ленин ячĕллĕ, «Колос», «Труд», «Рассвет», «Сатурн» ЯХПКсем тата хресчен /фермер/ хуçалăхĕсем те пур. Семинар-канашлăва хутшăннисем май пулнипе усă курса «Нива» агрофирма» ООО, «Труд», «Рассвет» ЯХПКсен уй-хирĕсенче пулса курчĕç, ялхуçалăх культурисен анисем епле таса, çумкурăксăр пулнине, фунгицидсемпе, ÿсентăрана парка çитĕнме пулăшакан микроудобренисемпе усă курнăран вĕсем çанталăк условийĕсене кура мар епле парка ÿссе çитĕннине хăйсен куçĕсемпе курса ĕненчĕç.
Ÿсентăран лаптăкĕсенчи çумкурăка тата тĕрлĕ чир-чĕре пĕтерме пулăшакан препаратсем туса кăларассипе ĕçлекен Тула облаçĕнчи Новомосковск хулинчи «ФМРус» ЗАОн маркетинг пайĕн ертÿçи Ф.Садртдинов, сывлăха сиен кÿмен çĕнĕ йышши биопрепаратсем кăларакан Пушкăртри «БашИнком» представителĕ Г.Шагиева тĕрлĕрен препаратсемпе мĕнле усă курасси тата вĕсен тухăçлăхĕ пирки тĕплĕн каласа кăтартрĕç, ыйтусем çине хуравсем пачĕç.
Семинар-канашлу ĕçне район администрацийĕн пуçлăхĕ Н.Миллин пĕтĕмлетнĕ.
Светлана АРХИПОВА.
«ФМРус» ЗАОн маркетинг пайĕн ертÿçи Ф.Садртдинов, «Восток» ООО директорĕ Л.Смирнова, «Труд» ЯХПКри тĕп агроном Э.Германова ялхуçалăх предприятийĕнче агротехника йĕркисене çирĕп пăхăнса çитĕнтернĕ куккурус уйĕнче.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»