13:40 25 июня 2015 г.
Аттелĕхĕн Аслă вăрçин ветеранĕ, Тăрмăш ялĕнче пурăнакан Петр Михайлович Михайлов çĕртме уйăхĕн 25-мĕшĕнче 90 çул тултарнă. Çак ятпа ăна район администрацийĕн пуçлăхĕн пĕрремĕш çумĕ Леонард Левый саламланă, ырлăх-сывлăх, канлĕ ватлăх суннă, сумлă юбилей ячĕпе Раççей Президенчĕ Владимир Путин ятран палăртса янă саламлă открыткăна панă.
Пархатарлă кун-çул таппине утса тухакан, тĕрлĕ çулсенче яваплă ĕç вырăнĕсенче тăрăшнă, халĕ те, хăйĕн çулĕсене кура мар иксĕлми вăй-халлă Петр Михайловича юбилей ячĕпе Пенси фончĕн районти уйрăмĕн тата халăха социаллă хỹтлĕх паракан пайĕн ертỹçисем - З.Яковлевапа И.Аникина, Тăрăм ял тăрăхĕн пуçлăхĕ В.Александров саламаланă, парнесем парса чыс тунă. Район хаçачĕн коллективĕнче тăрăшакансем те, паллах, ĕç ветеранне епле куç тĕлне тумĕç? Пирĕн аслă ĕçтешĕмĕр, хаклăран та хаклă, хисеплĕрен те хисеплĕ çыннăмăр Петр Михайлович ун чухнехи "Колхоз ялавĕ" хаçатра ĕçленĕ, редактор та пулнă. Редакцире 15 çула яхăн вăй хунă тапхăрта тăрăшуллă хаçат çынни тата пултаруллă ертỹçĕ пулнине кăтартса панă. Аттелĕхĕн Аслă вăрçин ветеранĕ ялти бригадирта, ВЛКСМ пуçламăш организацине ертсе пынă тата комсомол райкомĕн иккĕмĕш секретарĕ пулса ĕçленĕ çулсенче яш-кĕрĕме хастарлă, хыт утăмлă пулма хавхалантарнă. Унпа пĕрле ĕçленĕ çынсем пурте ăна ырă кăмăллă, сăпайлă, пултаруллă пулнине палăртаççĕ. Аслă ĕçтешĕмĕре район хаçачĕн коллективĕн ячĕпе пай редакторĕ Светлана Архипова, пичет ветеранĕсем - Иван Иноходовпа Анатолий Тимофеев саламаланă.
С.АНАТОЛЬЕВА.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»