15:06 10 апреля 2015 г.
Сире Космонавтика кунĕ ячĕпе саламлатăп!
Юрий Гагарин çĕр чăмăрĕ çинче пурăнакансенчен пĕрремĕш пулса тĕнче уçлăхне парăнтарнăранпа çур ĕмĕр ытла иртрĕ. Уçлăха тĕпчесе алла илесси пирĕн пĕтĕм планетăшăн питех те пысăк пĕлтерĕшлĕ. Ку енĕпе Чăваш Ен тивĕçлипе мухтанма пултарать, мĕншĕн тесен тĕнче уçлăхне парăнтарас ĕç историне унăн мухтавлă ывăлĕсен - Андриян Николаевăн, Николай Бударинăн тата Муса Манаровăн - ячĕсем ылтăн саспаллисемпе çырăнса юлнă.
Виççĕмĕш космонавт, икĕ хутчен Совет Союзĕн Геройĕ, авиаци генерал-майорĕ Андриян Николаев çуралса ỹснĕ тăрăхра, Сĕнтĕрвăрри районĕнчи Шуршăл салинче, легендарлă ентешĕмĕре халалласа асăну комплексĕ çĕклесе лартнă. Тĕнче уçлăхĕпе космонавтсем çинчен ытларах пĕлме, Андриян Григорьевич Николаевăн паттăрла пурнăçĕпе тĕплĕнрех паллашма май паракан çав комплекса килсе çỹрекенсен шучĕ çулсерен йышлăланать.
Паян республикăри "Элара" АУО, "Чăвашкабель" АУО, "Электроприбор" АУО пек предприятисенче вăй хуракан çĕршер ăсчахпа конструктор, испытательпе производство ĕçченĕ космос отраслĕн аталанăвне хăйĕн тỹпине хывать. Пултаруллă çамрăк космонавтсен юхăмĕ сарăлса пырать тата çирĕпленет, çавăнпа та эпĕ Чăваш Ен çывăх вăхăтрах тĕнчене çĕнĕ Гагаринсемпе Циолковскисене тата Королевсене парнелеме пултарасси пирки иккĕленместĕп!
Космос отраслĕнче ĕçлекен мĕнпур çынна çирĕп сывлăх, кăткăс та яваплă ĕçре çитĕнỹсем, телей тата ырлăх сунатăп.
М.ИГНАТЬЕВ,
Чăваш Республикин Пуçлăхĕ.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»