14:01 06 марта 2015 г.
Сире Пĕтĕм тĕнчери хĕрарăмсен кунĕ - Мартăн 8-мĕшĕ ячĕпе чун-чĕререн саламлатăп!
Пурнăçра мĕн çутти тата лайăххи пур, çавă веçех хĕрарăм сăнарĕнче палăрать. Хỹхĕм хĕрупраç мĕн авалтанах сăпайлă та тимлĕ, ĕçчен те тăрăшуллă пулнипе, ачашлăхĕпе тата ырă кăмăлĕпе уйрăлса тăрать. Çак паха енсем хĕрарăмсене кил-çурта хăтлăрах тума, çемье вучахĕн ăшшине сыхласа упрама, ачасене ăс парса ỹстерме, мĕнпур ĕçре çитĕнỹ тума пулăшса пыраççĕ.
Республика Правительстви ачалăхпа амăшлăха пулăшасси, çемье хаклăхĕсене çирĕплетесси çине уйрăмах пысăк тимлĕхпе пăхать. Çамрăк ача амăшĕсем çурату сертификачĕ, пособисем тата амăшĕн капиталĕ евĕр паракан укçа-тенкĕ пулăшăвне илеççĕ, патшалăх кỹрекен ытти пулăшу тĕсĕпе усă кураççĕ.
Ача амăшĕпе ача сывлăхне сыхлакан тытăмра медицинăн малта пыракан технологийĕсем хастарлăн ĕçе кĕреççĕ. Ача сачĕсем тăвасси кал-кал пурнăçланать, çакă ача амăшĕсене декрет отпускĕ хыççăн ĕçе часрах тухма май парать.
Патшалăх хăйсемшĕн çавнашкал тăрăшни хĕрарăмсене малашлăх çине ырă шанчăкпа пăхма хавхалантарать, республикăра ача çуратасси модăна кĕрсе пырать, нумай ачаллă çемьесен шучĕ ỹсет.
Эсир ачасене çĕршыва юрăхлă граждансем пулма ăс парса пăхса çитĕнтерессине хăвăр çине илнĕ, сире çав пархатарлă та яваплă ĕçĕршĕн пĕтĕм чунтан тав тăватăп.
Юратнă хĕрарăмсем! Çуркуннехи çак çутă та савăк уяв кунĕнче ырă кăмăлăршăн, чун тараватлăхĕшĕн, пирĕн пурнăçа çутăрах та хăтлăрах тата илемлĕрех тума пĕлнĕшĕн чĕререн тухакан тав сăмахĕсене йышăнсамăр!
Сире тата сирĕн çывăх çыннăрсене çирĕп сывлăх, юрату, ăнланупа чăтăмлăх, ырлăхпа телей сунатăп!
М.ИГНАТЬЕВ,
Чăваш Республикин Пуçлăхĕ.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»