10:34 21 января 2015 г.
Январĕн 17-мĕшĕнче, Раççей тата Чăваш пичечĕсен кунĕсене уявланă кун, Чăваш Ен Пуçлăхĕ Михаил Игнатьев республикăри тата регионсенчи массăллă информаци хатĕрĕсен тĕп редакторĕсемпе ирттернĕ "çавра сĕтел" ĕçне хутшăннă. "Массăллă информаци хатĕрĕсен тата влаç органĕсен халăхăн çивĕч ыйтăвĕсене татса парас ĕçри вырăнĕ" темăпа калаçнă.
Ларăва çавăн пекех Чăваш Республикин Министрсен Кабинечĕн Председателĕн заместителĕ - ЧР информаци политикин тата массăллă коммуникацисен министрĕ Александр Иванов, ЧР Журналистсен союзĕн председателĕ Валерий Комиссаров хутшăннă.
Михаил Игнатьев республикăри МИХсен ертỹçисене професси уявĕпе саламланă, калем ăстисене хастар ĕçленĕшĕн тав тунă.
"Обществăра ĕçлекен çынна хисеплеме вĕрентмелле", - палăртнă Михаил Игнатьев. Чăн-чăн журналистăн пултаруллă, пысăк квалификациллĕ пулмалла. Ăс-хакăл, кăмăл-сипет, совеç, йĕркеллĕ пулни тĕп вырăнта.
"Çавра сĕтел" влаç органĕсемпе пресса информаци материалĕсем хатĕрленĕ чухнехи тĕрлĕ тапхăрта çыхăну тытас ыйтусене, чиновниксем критика материалĕсене мĕнле йышăннине, ку чухнехи информаци технологийĕсемпе усă курмалли çĕнĕ мелсене ĕçе кĕртессине, республикăри массăллă информаци хатĕрĕсем валли кадрсем хатĕрлессине сỹтсе явнă.
"Хыпар" хаçатăн тĕп редакторĕ Валерий Туркай "Чăваш Республикин хисеплĕ журналисчĕ" ят çирĕплетме сĕннĕ. "Çавра сĕтеле" хутшăннисем ăна ырласа йышăннă.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»