13:57 27 декабря 2014 г.
Валерий Зинонович АФАНАСЬЕВ, Аслă Елчĕк ял тăрăхĕн пуçлăхĕ:
2014 çул Аслă Елчĕксемшĕн культурăри чылай пулăмсемпе палăрса юлчĕ.
Аслă Елчĕк ялне никĕсленĕренпе 455 çул çитнине палăртса ялăн пысăк уявĕ иртрĕ. Унта республикăри культура министрĕ В.Ефимов хутшăнчĕ. Вăл ялти культура çуртне музыка инструменчĕсем, сцена костюмĕсем туянма 400 пин тенкĕлĕх сертификат пачĕ. Сăмах май, маларах культура çуртне хăтлăх кĕртме республика бюджетĕнчен 750 пин тенкĕ, вырăнти бюджетран 229 пин тенкĕ уйăрнăччĕ - укçапа алăксене, чỹречесене улăштарма, çуртăн маччине çĕнетме усă курнă. Сĕтел-пукана та хăйсен вăйĕпе юсанă. Культура çурчĕ районти улттăмĕш тĕслĕх клубĕ пулса тăчĕ. Ял уявĕнче тĕп лапамра тăван яла аталантарас тĕлĕшпе вăй-халне шеллемен, "Хисеп Палли" ордена, медальсене тивĕçнĕ Ленин ячĕллĕ хуçалăх ертỹçине В.Горшкова асăнса Асăну хăмине уçрăмăр.
Культура çулталăкне вĕçлесе иртнĕ районти мероприяти те ял-йыш асĕнче юлчĕ. Кунта, çĕнелнĕ культура çуртĕнче районти пултарулăх коллективĕсем ташă-юрăпа, тĕрлĕ куравпа савăнтарчĕç. Культура мероприятийĕсем ирттернисĕр пуçне, ял тăрăхĕнче ытти ĕçсене те сахал мар пурнăçлатпăр. Аслă Елчĕксен ырă йăла пур - çынсем хăйсем укçа-тенкĕ пухса ял урамĕсене вак чул сарса хытараççĕ. Çакă йĕпе-сапара та транспорт хатĕрĕсене пĕр чăрмавсăрах çỹреме май парать. Кăçал çеç Пушкин, Макаренко урамĕсенче 420 метр ытла çула чул сарнă. Тирпей-илем кĕртесси, йывăç-тĕм лартасси те тĕп вырăнта.
Кăçал пурнăçланипе лăпланса ларма шутламастпăр, килес çул та ĕçсене малалла тăсăпăр.
АУ «Редакция Яльчикской районной газеты "Елчек ен" ("Яльчикский край") Мининформполитики Чувашии»